Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 332 Hüküm no: 423 Orijinal metin no: [63a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Hüseyin’in, meyhaneci Andon’un kendisine küfrettikleri yolundaki şikayetini ispatlayamadığı Mahrûsa-i Galata’da sâkin Mustafa b. Hüseyin mahfil-i kazâ[da] meyhâneci tâifesinden işbu râfi‘ü’s-sifr Toma v. Dimitri nâm zimmî ile Andon v. Yanaki nâm zimmîler muvâcehelerinde üzerlerine da‘vâ ve takrîr-i kelâm edip târih-i kitâb günü merkūmân Toma ve Andon benim dînime îmânıma cimâ‘ lafzı ile şetm etmişlerdir. Merkūmândan suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı aczile istihlâf etmeğin fi’l-vâki‘ müdde‘î-i mezbûrun vech-i muharrer üzre dîn ve îmânına cimâ‘ lafzı ile şetm eylemediklerine merkūmân Toma ve Andon’a yemîn teklîf olundukda onlar dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeleri ile müdde‘î-i merkūm bî-vech mu‘ârazadan men birle mâ vaka‘a bi’t-taleb ketb olundu. Fi’l-yevmi’s-sâlis aşer min Zilhicceti’[63b]ş-şerîfe li sene selâse ve seb‘în ve elf. Min hicreti men lehü’l-izzü ve’ş-şeref. Şuhûdü’l-hâl: Kethüdâ İsmail Ağa b. ( ), Ebûbekir Beşe b. Musli Çukadâr, Ahmed Yazıcı b. Mehmed, Muharrem b. Receb ve gayruhüm.