Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 332 Hüküm no: 424 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. İspilyoti’nin varislerinin Varilci Yani aleyhindeki alacak davasında sulh oldukları Mahrûsa-i İstanbul’da Samatya kurbunda vâki‘ Zeytun mahallesinde sâkin iken bundan akdem hâlik olan Yorgi v. İspilyoti nâm zimmînin verâseti sulbî kebîr oğlu İspandoli’ye ve sulbî sagīr oğlu Yanaki’ye ve sulbiye sagīre kızı Peruza’ya münhasıra olduğu şer‘an zâhir ve müte‘ayyin olduğundan sonra merkūm İspandoli kendi tarafından asâleten ve sagīrân-ı merkūmâna tesviye-i umûrlarına kıbel-i şer‘den mansûb vasîleri olmağla vesâyeten mahfil-i kazâda varilci tâifesinden işbu râfi‘ü’l-kitâb Yani v. Manuso nâm zimmî muvâcehesinde bi’l-vesâye ve bi’l-asâle ikrâr ve takrîr-i kelâm edip babam hâlik-i mezbûr hâl-i hayât ve kemâl-i sıhhatinde iken merkūm Yani ile varilcilik san‘atında olup mezbûr ile fesh-i akd-i şirket eylediği hînde babam hâlik-i merkūm Yorgi sermâyeden olan yüz yirmi bin akçe fâide hâsıl olmuşdur babam hâlik-i merkūmun hissesine fâide-i merkūmeden elli bin akçe isâbet eder deyû meblağ-ı mezbûr elli bin akçeyi merkūm Yani’den taleb ve da‘vâ ol dahi hâlik-i mezbûr ile beynlerinde yüz bin akçe fâide hâsıl olduğunu inkâr etmekle, ben dahi müdde‘âmı isbâtdan âciz ve merkūm Yani dahi aynı sadedinde olmağın bu husûsda sulh sagīrân-ı mezbûrâna evlâ ve enfa‘ olmağla beynimizde muslihûn tavassut edip meblağ-ı mezbûrdan beni on altı bin akçeye sulh eylediklerinde ben dahi asâleten ve vesâyeten sulh-i mezbûru kabûl ve bedel-i sulh olan meblağ-ı mezbûru merkūm Yani yedinden bi’t-tamâm ve’l-kemâl ahz ü kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Hasan Beşe b. Abdullah, İbrahim Beşe b. Abdülkerim, üstâd Mehmed b. Ali, Mustafa Efendi b. Musa el-İmâm, el-Hâc Süleyman b. Hüseyin, Receb b. Nasuh, Mustafa Beşe b. Şaban el-Haffâf.