Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 333 Hüküm no: 425 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İspandoli v. Yorgi’nin vasisi bulunduğu Yanaki ve Peruza için anneleri Filipa’ya iki senelik nafakalarını teslim ettiği Mahrûsa-i İstanbul’da Samatya kurbunda vâki‘ Zeytun mahallesinde sâkin iken bundan akdem hâlik olan Yorgi v. İspilyoti nâm zimmînin verâseti sulbî kebîr oğlu İspandoli’ye ve sulbî sagīr oğlu Yanaki’ye ve sulbiye sagīre kızı Peruza’ya münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın tesviye-i umûrlarına kıbel-i şer‘den mansûb vasîleri olan Filipa bt. ( ) nâm nasrâniye muvâcehesinde takrîr-i kelâm edip sagīrân-ı mezbûrâna babaları hâlik-i merkūmdan intikāl edip yedimde olan defter-i kassâm mûcebince akçelerinden târih-i kitâbdan iki sene mukaddem ikisine yevmî onar akçe nafaka farz ve takdîr olunmağla iki senede sagīrlerin nafaka ve mefrûzaları için vâlideleri mezbûre Filipa’nın yedine mallarından cem‘an yedi bin iki yüz akçe def‘ ve teslîm etmekle suâl olunup mezbûrenin takrîri tahrîr olunmak matlûbumdur dedikde gıbbe’s-suâl mezbûre Filipa cevâbında fi’l-vâki‘ sagīrân-ı mezbûrânın vasîleri olan merkūm İspandoli yedinden iki senede cem‘an yedi bin iki yüz akçe nafaka ve mefrûzalarını bi’t-tamâm ahz ü kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: İbrahim Beşe b. Abdülkerim, üstâd Mehmed b. Ali, Mustafa Efendi b. Musa el-İmâm, Mustafa Beşe b. Şaban, Receb Beşe b. Nasuh.