Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 725 Hüküm no: 938 Orijinal metin no: [112a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsrail v. Semuyil’in, Ömer Ağa b. Ahmed Çavuş’tan alacağı olduğu Göllükesri cemâ‘atinden İsrail v. Semuyil nâm Yahudi meclis-i şer‘-i hatîrde Ömer Ağa b. Ahmed Çavuş mahzarında üzerine da‘vâ ve takrîr-i kelâm edip merkūm Ömer Ağa zimmetinde cihet-i deyn-i şer‘îden altı yüz altmış esedî guruş hakkım olup hattâ vech-i muharrer üzre meblağ-ı mezbûr bana deyni olduğunu bin yetmiş altı Ramazânı’nın beşinci gününde Bâb mahkemesi’nde hâlâ hilâfete müvellâ olan Mehmed Efendi b. Mustafa huzûrunda ikrâr ve mûcebince mûmâ-ileyh Mehmed Efendi yedine hüccet-i şer‘iyye dahi vermişiken hâlâ meblağ-ı mezbûru merkūmdan taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezkûr Ömer Ağa cevâbında vech-i muharrer üzre târih-i mezbûrda mahmiye-i mezkûrda Bâb mahkemesi’nde hilâfete müvellâ olan mûmâ-ileyh Mehmed Efendi huzûrunda müdde‘î-i mezbûra cihet-i merkūmeden zimmetimde altı yüz altmış beş esedî guruş deynim vardır deyû ikrâr etmişdim lâkin vech-i meşrûh üzre olan ikrârımda kâzibim deyicek fi’l-vâki‘ merkūm Ömer Ağa ikrâr-ı mezbûrunda kâzib ve müdde‘î-i mezbûr İsrail da‘vâ-yı meşrûhasında mubtıl olmadığına merkūm İsrail’e yemîn teklîf olundukda ol dahi alâ vefki’l-mes’ûl yemîn billâhi’llezî enzele’t-Tevrâte alâ Musa -aleyhisselâm- etmeğin mûcebince meblağ-ı mezbûru müdde‘î-i merkūma edâya merkūm Ömer Ağa’ya tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: Arslan Çavuş [b.] Abdullah, Mehmed Çelebi b. Ömer, Mehmed Bey b. Abdullah, İbrahim Çelebi b. Ahmed.