Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 338 Hüküm no: 432 Orijinal metin no: [65a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Mahmud’un vefat eden eşi Abdülkâdir Kapudân’ın mirasından payına düşeni aldığı Mahmiye-i Galata hâricinde vâki‘ el-Hâc Memi mahallesinde sâkin iken bundan akdem vefât eden Abdülkādir Kapudân b. ( )’in verâseti zevce-i metrûkesi Emine bt. el-merhûm Mahmud Efendi ile babası Abdürrahim Kapudân b. Mehmed nâm kimesneye münhasıra olduğu şer‘an zâhir ve müte‘ayyin oldukdan sonra mezbûre Emine Hâtun tarafından husûs-ı âti’l-beyânı ikrâra vekîl olup hasm-ı şer‘î-i câhid mahzarında mezbûrenin zâtını ma‘rifet-i şer‘iyye ile ârifân olan Abdullah Efendi b. el-merhûm el-mezbûr Mahmud Efendi ve Hüseyin b. Mehmed nâm kimesneler şehâdetleri ile şer‘an vekâleti sâbite olan sadrî kebîr oğlu Ahmed Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde müteveffâ-yı mezbûrun muhallefâtına vâzı‘ü’l-yed olan işbu râfi‘ü’l-kitâb mezbûr Abdürrahim Kapudân mahzarında bi’l-vekâle ikrâr ve takrîr-i kelâm edip müvekkile-i mezbûre Emine Hâtun zevci müteveffâ-yı mezbûr Abdülkādir Kapudân’ın zimmetinde mütekarrir ve ma‘kūdun aleyh olan yirmi bin akçe mehr-i müeccelini tereke-i müteveffâ-yı mezbûrdan olmak üzre merkūm Abdürrahim Kapudân’ın yedinden tamâmen ahz ü kabz eylediğinden mâ‘adâ müteveffâ-yı mezbûrun muhallefâtından akār ve menkūlât ve sâir esâs-ı beyt ve evânî-i nühâsiyye ve gayr-ı nühâsiyye ve bi’l-cümle ismi mâl ıtlâk olunur eşyâsından rub‘ hisse-i şer‘iyyesini mezbûr Abdürrahim Kapudân’ın yedinden bi’t-tamâm ve’l-kemâl ahz ü kabz edip muhallefât-ı müteveffâ-yı mezbûra müte‘allika âmme-i de‘âvî [ve] mütâlebâtdan mezbûr Abdürrahim Kapudân’ın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mehmed Efendi b. Mustafa İmâm-ı Câmi‘-i Kebîr, es-Seyyid Mehmed Efendi Kāimmakām-ı imâm, Şaban Efendi b. el-Hâc Maden Sinobî, el-Hâc Hüseyin Efendi İmâm-ı mahalle-i mezbûre, Mehmed Efendi b. Bâli, Hüseyin Çelebi b. Mehmed, Ahmed Çelebi b. Mehmed, el-Hâc İsa b. Mehmed, Ahmed Yazıcı b. Mehmed, Hamza b. Abdülganî ve gayruhüm.