Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 339 Hüküm no: 433 Orijinal metin no: [65a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ahmed b. Osman’ın vefat eden Mustafa’da olan alacağının terekesinden ödenmesi hususunda beytülmâl eminine tenbihte bulunulması Mahrûsa-i Galata’da Câmi‘-i Kebîr mahallesinde sâkin işbu râfi‘ü’l-kitâb el-Hâc Ahmed b. Osman nâm kimesne mahfil-i kazâda mahrûsa-i merkūmeye tâbi‘ Ortaköy nâm karyede sâkin iken bundan akdem bilâ-vâris fevt olan Mustafa nâm kimesnenin muhallefâtına vâzı‘ü’l-yed olan umdetü’l-a‘yân Siyavuş [65b] Ağa’nın kethüdâsı ve tarafından vekîl-i sâbitü’l-vekâlesi olan İsmail Ağa b. ( ) nâm kimesne mahzarında üzerine da‘vâ ve takrîr-i kelâm edip cezîre-i İstanköy’de sâkin aşçı Mustafa nâm kimesnenin bi tarîki’l-emâne yedimde olan altmış sekiz esedî guruş hakkını târih-i kitâbdan mukaddem mahmiye-i İstanbul’da Tahtakale’de sâkin es-Seyyid Mehmed Çelebi nâm kimesnenin odasında mezbûr aşçı Mustafa’ya îsâl için müteveffâ-yı mezbûrun yedine meblağ-ı mezbûr altmış sekiz esedî guruşu def‘ ve teslîm ol dahi vech-i muharrer üzre ahz ü kabz eyledikden sonra müteveffâ-yı mezbûr meblağ-ı merkūmu mezbûr aşçı Mustafa’ya îsâl etmeden mücehhelen vefât etmekle yedinde kalmışdır vekîl-i mezbûrdan suâl olunup terekesinden alıverilmesi matlûbumdur dedikde gıbbe’s-suâl vekîl-i merkūm cevâbında fi’l-vâki‘ emîn-i mezbûr muhallefât-ı müteveffâ-yı merkūma vaz‘-ı yedini ikrâr lâkin husûs-ı mezbûru inkâr edicek, müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden el-Hâc Hicâzî b. Ömer ve Mehmed b. Ali nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i mezbûr el-Hâc Ahmed târih-i merkūmda zikr olunan odada mezbûr aşçı Mustafa’ya îsâl için bizim huzûrumuzda müteveffâ-yı merkūmun yedine altmış sekiz esedî guruş def‘ ve teslîm ol dahi vech-i muharrer üzre ahz ü kabz edip mücehhelen vefât eyledi. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-tasdîki’ş-şer‘î şehâdetleri makbûle olmağın ba‘de’t-tahlîfi’ş-şer‘î meblağ-ı mezbûru müteveffâ-yı mezbûrun tereke-i vâfiyesinden müdde‘î-i merkūma edâya vekîl-i mezbûra tenbîh birle mâ vaka‘a bi’t-taleb ketb olundu. Fi’l-yevmi’s-sâdis aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: El-Hâc Kenan b. Abdullah, çukadâr Ebûbekir Beşe b. Şaban, el-Hâc Ramazan b. Ahmed, Mustafa Çelebi b. Receb, Ahmed Yazıcı b. Mehmed.