Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 340 Hüküm no: 434 Orijinal metin no: [65b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat etmiş olan Yorgi v. İspilyoti’nin, cariyesi Anaşta v. Yuvan’ı ölmeden önce azat etmiş olduğu İşbu orta boylu açık kaşlı, sarı elâ gözlü sol gözünün altında eser-i cerâhati olan Rusiyyetü’l-asl hâfızatü hâzihi’l-vesîka Anaşta bt. Yuvan meclis-i şer‘-i hatîr-i lâzımü’t-tevkīrde mahrûsa-i İstanbul’da Zeytun mahallesinde sâkin bundan akdem hâlik olan Yorgi v. İspilyoti nâm zimmînin verâseti zevce-i metrûkesi Filipa bt. ( ) nâm nasrâniye ile sulbî kebîr oğlu İspentofi’ye ve sulbî sagīr oğlu Yanaki’ye ve sulbiye sagīre kızı Peruza’ya münhasıra olduğu şer‘an zâhir ve müte‘ayyin oldukdan sonra kendi tarafından asıl ve sagīr-i mezbûrânın tesviye-i umûrlarına kıbel-i şer‘den mansûbe vasîleri olan merkūm İspentofi muvâcehesinde üzerine da‘vâ ve takrîr-i kelâm edip hâlik-i mezbûr Yorgi târih-i kitâbdan ( ) sene mukaddem [beni i‘tâk etmişidi] vasiyy-i merkūm İspentofi rık olmak üzre bana vaz‘-ı yed eder, suâl olunup üzerimden yed-i âriyesi kasr ve izâle ve sebîlim tahliye olunmak matlûbumdur dedikde gıbbe’s-suâl ve akībe’l-inkâr mevsûfe-i mezkûre Anaşta’dan müdde‘âsını mübeyyine beyyine taleb olundukda mahalle-i mezbûre sükkânından Anesto v. Kosta ve Kostantin v. Todori ve Yorgi v. Todori nâm zimmîler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ hâlik-i merkūm Yorgi târih-i kitâbdan ( ) sene mukaddem sıhhati hâlinde mevsûfe-i mezbûre Anaşta’yı bizim huzûrumuzda i‘tâk edip sâir harâir-i asliyyâta ilhâk eylemişdir. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın mûcebiyle mevsûfe-i mezbûre Anaşta’nın ıtkına hükm ve sebîli tahliye olunup mâ vaka‘a bi’t-taleb ketb olundu. Fi’l-yevmi’s-sâbi‘ aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Ahmed Yazıcı b. Mehmed, Abdülkerim Efendi b. Mehmed, Hasan Efendi b. Hüsameddin, el-Hâc Ramazan b. Mehmed, Mehmed Çelebi b. Abdi ve gayruhüm.