Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 341 Hüküm no: 435 Orijinal metin no: [65b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Mahmud’un cariyesi Dilâver’i azat ettiği Mahmiye-i Galata hâricinde el-Hâc Memi mahallesi sâkinelerinden Emine Hâtun bt. el-merhûm Mahmud Efendi tarafından ıtk-ı âti’l-beyânı ikrâra vekîl olup mezbûreyi ma‘rifet-i şer‘iyye ile ârifân olan Abdullah Efendi b. el-merhûm Mahmud Efendi ve Hüseyin Efendi b. Mehmed Efendi nâm kimesneler şehâdetleri ile [66a] şer‘an vekâleti sâbite olan sulbî kebîr oğlu Ahmed Çelebi meclis-i şer‘de müvekkile-i mezbûrenin câriye-i memlûkesi ve rıkkına mu‘terife olan hâfızatü hâze’l-kitâb uzun boylu gök elâ gözlü Rusiyyetü’l-asl Dilâver bt. Abdullah muvâcehesinde bi’l-vekâle ikrâr ve takrîr-i kelâm edip müvekkile-i mezbûre Emine Hâtun câriye-i memlûkesi mevsûfe-i mezbûre Dilâver’i hasbeten lillâhi te‘âlâ i‘tâk [ve] tahrîr edip silk-i mülkünden ihrâc [ve] izâle eyledi min ba‘d mezbûre Dilâver sâir harâir-i asliyyât gibi hürre olup üzerinde hakk-ı velâdan gayrı hakkı kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mehmed Efendi b. Mustafa el-İmâm, es-Seyyid Mehmed Efendi b. ( ), Şaban Efendi b. el-Hâc Maden, el-Hâc Hüseyin b. imâm-ı mahalle-i mezbûr ve gayruhüm.