Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 341 Hüküm no: 436 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Abdülkâdir Kapudân’ın varislerinin, miras olarak kendilerine intikal eden köle Rıdvan’ı azat ettikleri Mahmiye-i Galata hâricinde vâki‘ el-Hâc Memi mahallesinde sâkin iken bundan akdem vefât eden Abdülkādir Kapudân’ın verâseti zevce-i metrûkesi Emine Hâtun bt. el-merhûm Mahmud Efendi ile babası Abdürrahim Kapudân b. Mehmed nâm kimesneye münhasıra olduğu şer‘an zâhir ve mütehakkik oldukdan sonra merkūm Abdürrahim Kapudân asâleten ve mezbûre Emine tarafından ıtk-ı âti’z-zikri ikrâra vekîl olup hasm-ı şer‘î-i câhid mahzarında mezbûreyi ma‘rifet-i şer‘iyye ile ârifân olan Abdullah Efendi b. el-merhûm Mahmud Efendi ve Hüseyin b. Mehmed nâm kimesneler şehâdetleri ile şer‘an vekâleti sâbite olan sulbî kebîr oğlu Ahmed Çelebi b. Mehmed vekâleten meclis-i şer‘de müteveffâ-yı mezbûrdan mezbûr Abdürrahim Kapudân ile müvekkile-i mezbûreye irs-i şer‘le intikāl eden çatık kaşlı elâ gözlü, uzun boylu Rusiyyü’l-asl işbu râfi‘ü’l-kitâb Rıdvan b. Abdullah muvâcehesinde bi’l-vekâle ve bi’l-asâle ikrâr ve takrîr-i kelâm edip mevsûf-ı mezbûr Rıdvan’ı hasbeten lillâhi’l-azîm ve taleben li merzâti Rabbi’r-rahîm asâleten ve vekâletimiz hasebiyle tahrîr ve i‘tâk ve zümre-i ahrâr-ı asliyyîne ilhâk ve idrâc eyledik min ba‘d mevsûf-ı mezbûr sâir ahrâr-ı asliyyîn gibi hür olup üzerinde hakk-ı velâdan gayrı hakkımız kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mehmed Efendi b. Mustafa el-İmâm, es-Seyyid Mehmed Efendi Kāimmakām-ı imâm, Şaban Efendi b. Maden, el-Hâc Hüseyin İmâm-ı mahalle-i mezbûre, Mehmed Efendi b. Bâli ve gayruhüm.