Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 345 Hüküm no: 442 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arhoncese bt. Karaca’nın evini ve tarlalarının tasarruf hakkını Ezmerağda’ya sattığı Mahmiye-i İstanbul’da Fenerkapısı hâricinde sâkine Arhoncese bt. Karaca nâm nasrâniye tarafından bey‘ ve tefvîz-i âti’l-beyânı ikrâra vekîl olup hasm-ı şer‘î-i câhid mahzarında mezbûreyi ma‘rifet-i şer‘iyye ile ârifân olan Mustafa b. Receb ve el-Hâc Ramazan b. Mahmud nâm kimesneler şehâdetleri ile şer‘an vekâleti sâbite olan Papa Danyal v. Nikola nâm râhib meclis-i şer‘-i hatîrde râfi‘atü’l-vesîka Ezmerağda bt. Atanaş nâm nasrâniyenin zevci ve tarafından ikrâr-ı âti’l-beyânı tasdîka vekîl olup bimâ hüve nehcü’s-sübût şer‘an vekâleti sâbite olan Yanaki v. Seradana nâm zimmî muvâcehesinde bi’l-vekâle ikrâr ve takrîr-i kelâm edip müvekkilem mezbûre Arhoncese silk-i mülkünde münselik olup mahmiye-i Galata müzâfâtından Mîrali nâhiyesine tâbi‘ Arnavud nâm karyede vâki‘ bir tarafdan Canik mülkü ve bir tarafdan Mavridi mülkü ve bir tarafdan arz-ı hâliye ve iki tarafdan tarîk-i âm ile mahdûd bir kıt‘a ve yine karye-i mezbûrede Harista nâm mevzi‘de vâki‘ bir tarafdan Yamandi mülkü ve bir tarafdan arz-ı hâliye ve iki tarafdan tarîk-i âm ile mahdûd mülk bağlarını ve yine karye-i mezbûrede vâki‘ ma‘lûmü’l-hudûd iki bâb mahzeni bi safka-i vâhide müvekkile-i mezbûre Ezmerağda’ya bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm edip yine karye-i mezbûre sınırı dâhilinde vâki‘ merhûm ve mağfûrun leh Şehzâde Sultan Mehmed Hân -aleyhi’r-rahmetü ve’r-rıdvân- hazretlerinin evkāfı arâzisinden olup tasarrufunda olan inde’l-ahâlî ve’l-cîrân ma‘lûmü’l-hudûd on yedi kıt‘a tarlalarının dahi hakk-ı tasarrufunu ma‘rifet-i mütevellî ile müvekkile-i mezbûreye beş yüz akçe bedel mukābelesinde ferâğ ve tefvîz edip ol dahi vech-i muharrer üzre tefevvuz ve kabûl eyledikden sonra semen-i mezbûr bin beş yüz akçe ile bedel-i merkūm akçe ki cem‘an iki bin akçeyi müvekkilem mezbûre Arhoncese yedinden tamâmen ahz ü kabz eyledi ba‘de’l-yevm zikr olunan bağlar ve mahzenler mülk-i müşterâsı ve tarlalar dahi hakk-ı müfevvazıdır, keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Fahrü’l-kuzât Nasuh Efendi, fahrü’l-müderrisîni’l-kirâm Abdülkerim Efendi, Âbid b. Mustafa el-Muhzır, Muharrem b. Receb ve gayruhüm.