Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 346 Hüküm no: 444 Orijinal metin no: [67a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Abdülkâdir Kapudân’ın varislerinden babası Abdürrahim’in terekeden hissesini diğer varis Emine’den teslim aldığı Mahmiye-i Galata hâricinde vâki‘ el-Hâc Memi mahallesinde sâkin iken bundan akdem vefât eden Abdülkādir Kapudân’ın verâseti zevce-i metrûkesi Emine Hâtun bt. el-merhûm Mahmud Efendi ile babası Abdürrahim Kapudân b. Mehmed nâm kimesneye münhasıra oldukdan sonra meclis-i şer‘de müteveffâ-yı mezbûrun muhallefâtına vâzı‘atü’l-yed olan râfi‘atü hâze’l-vesîka mezbûre Emine Hâtun’un tarafından husûs-ı âti’l-beyâna vekîl olup ve mezbûrenin zâtını ma‘rifet-i şer‘iyye ile ârifân olan Abdullah Efendi b. el-merhûmü’l-mezbûr Mahmud Efendi ve Hüseyin b. Mehmed nâm kimesneler şehâdetleri ile şer‘an vekâleti sâbite olan sadrî oğlu Ahmed Çelebi b. Mehmed nâm mahzarında ikrâr ve takrîr-i kelâm edip müteveffâ-yı mezbûrun muhallefâtından akār ve menkūlât ve sâir esâs-ı beyt ve evânî-i nühâsiyye ve gayr-ı nühâsiyye bi’l-cümle ismi mâl ıtlâk olunur eşyâsından hisse-i şer‘iyye-i ma‘lûmeyi müvekkile-i merkūme Emine Hâtun’un yedinden bi’t-tamâm ahz ü kabz edip muhallefât-ı müteveffâ-yı mezbûra müte‘allika âmme-i de‘âvîden müvekkile-i mezbûre [67b] mezbûrenin zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mehmed Efendi b. Mustafa el-İmâm-ı Câmi‘-i Kebîr, es-Seyyid Mehmed Efendi Kāimmakām-ı imâm, Şaban Efendi b. el-Hâc Maden Sinobî, Mehmed Efendi b. Bâli el-Kadı, Hüseyin Çelebi b. Mehmed, Ahmed Çelebi b. Mehmed, Mustafa Çelebi b. Receb, el-Hâc İsa b. Mehmed, Ahmed Yazıcı b. Mehmed.