Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 347 Hüküm no: 445 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yanaki ile Sava’nın miras malından dolayı olan anlaşmazlığının sulh ile neticelendiği Mahmiye-i Galata müzâfâtından Yeniköy nâm karye sâkinlerinden iken bundan akdem hâlike olan Sife bt. Sömed nâm nasrâniyenin verâseti zevc-i metrûkü Yanaki v. Karanfil nâm zimmî ile li ebeveyn er karındaşı Sava nâm zimmîye münhasıra olduğu şer‘an zâhir [ve] mütehakkik oldukdan sonra mezbû[r] Yanaki meclis-i şer‘de işbu râfi‘ü’s-sifr mezbûr Sava muvâcehesinde ikrâr ve takrîr-i kelâm edip hâlike-i mezbûrenin mecmû‘ terekesi olup vaz‘-ı yed eylediğim yüz guruşdan mezbûr Sava hisse-i şer‘iyyesini mukaddemâ benden da‘vâ ve taleb edip beynimizde münâza‘ât-ı kesîre vukū‘undan sonra vesâtat-ı muslihîn ile da‘vâ-yı mezkûresinden mezbûr Sava’yı otuz guruş üzerine sulh eylediğimizde ol dahi sulh-i mezbûru kabûl eylediğimden sonra bedel-i sulh olan meblağ-ı mezbûr otuz guruşu tamâmen def‘ u teslîm etmişidim. El-hâletü hâzihî verdiğim bedel-i sulh-i mezbûra ve sâir tereke-i hâlike-i mezbûreye müte‘allika âmme-i da‘vâdan mezbûr Sava’nın zimmetini ibrâ-i âm ve kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi b. Receb, Mustafa b. Muharrem, Âbidin b. Mehmed, Zülfikār b. İbrahim, Emrullah b. Mehmed ve gayruhüm.