Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 347 Hüküm no: 446 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Katibe bt. Abdullah’ın tasarrufunda olan Hamid Efendi Vakfı’na ait arsayı vakfa iade ettiği Mahmiye-i Galata dâhilinde Câmi‘-i Kebîr mahallesinde sâkine Kâtibe bt. Abdullah nâm hâtun mahfil-i kazâda merhûm ve mağfûrun leh Hamid Efendi vakfı’na bi’l-fi‘l mütevellî olan Halil b. ( ) tarafından ikrâr-ı âti’z-zikri tasdîka sâbitü’l-vekâle vekîli olan Hasan b. Mustafa nâm kimesne mahzarında ikrâr ve takrîr-i kelâm edip vakf-ı mezbûrdan olup icâre-i mu‘accele ve ücret-i müeccele ile taht-ı tasarrufumda olan mahmiye-i merkūme dâhilinde Bereketzâde mahallesinde vâki‘ bir tarafı cidâr-ı hısn ve bir tarafdan Hasan Ağazâde Abdülbâkī Ağa mülkü ve bir tarafdan Mehmed b. ( ) mülkü ve bir tarafdan tarîk-i hâs ile mahdûd arsa üzerine icâre-i mu‘acceleme mahsûb olmak üzre binâya iktidârım olmamağla arsa-i mezbûreyi cânib-i vakf-ı mezbûra fâriğa oldum ba‘de’l-yevm arsa-i merkūmeyi mütevellî-i vakf-ı mezbûr zabt edip dilediği kimesneye îcâr eylesin dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa b. Receb, Ahmed Yazıcı b. Mehmed, Mustafa b. Âbidin, Emrullah b. Mehmed ve gayruhüm.