Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 348 Hüküm no: 448 Orijinal metin no: [67b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emrullah Çelebi ile Musli Beşe’nin evleri arasındaki arsanın ortak yol olarak tespit edildiği Husûs-ı âti’l-beyânın mahallinde istimâ’ı iltimâs olunmağın savb-ı şer‘den umdetü’l-müderrisîn Abdülgaffâr Efendi irsâl olunup ol dahi hâssa mi‘mârlarından üstâd Ali b. Abdullah ile mahmiye-i Galata’ya tâbi‘ Rumeli hâricinde Baltalimanı kurbunda Başmakçı Şücâ‘ mahallesinde vâki‘ [68a] râfi‘-i hâze’l-kitâb Emrullah Çelebi b. Cafer Ağa’nın menziline varıp zeyl-i kitâbda mastûrü’l-esâmî olan müslimîn ile akd-i meclis-i şer‘-i şerîf eyledikde müşârün-ileyh Emrullah Çelebi ma‘kūd-ı mezkûrda câr-ı mülâsıkı olan Musli Beşe b. Abdullah mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafdan benim âhar mülküm ve bir tarafdan cebel ve bir tarafdan mezbûr Musli Beşe mülkü ve bir tarafdan tarîk-i âm ile mahdûd olup işbu akd-i meclis olunan mülk menzilime mahsûs sokak kapısından girip menzilim hudûdu dâhilinde olan mülk arsamdan menziline mezbûr Musli Beşe dâimâ mürûr ubûr eder, suâl olunup men‘ olunması matlûbumdur dedikde gıbbe’s-suâl merkūm Musli Beşe cevâbında benim sâkin olduğum menzilim ile müdde‘î-i mezbûr Emrullah Çelebi’nin menzil-i mahdûd-ı mezbûru mukaddemâ Mehmed Subaşı nâm kimesnenin mülk menzili olmağla merkūm Mehmed Subaşı bin elli üç senesinde benim menzilimi kendi menzilinden ifrâz ve alâmât-ı fâsıla vaz‘ edip zikr olunan sokak kapısı beynimizde müşterek olup menzileyn beyninden menzilime gidecek bana hakk-ı mürûr ta‘yîn etmek üzre zikr olunan menzilimi bana on bin akçeye bâtten bey‘ ve teslîm ben dahi vech-i muharrer üzre iştirâ ve tesellüm edip hakk-ı mürûrum olduğuna binâen arsa-i merkūmeden menzilime ubûr ederim vâki‘ hâl mahalle-i mezbûre ahâlîsinden olup hâzırûn bi’l-meclis olan müslimînden istihbâr olunsun demekle ahâlî-i mahalliyeden olup meclis-i mezbûre hâzırûn olan el-Hâc Mustafa b. Hamza ve Mustafa Beşe b. Piyâle ve Mehmed Beşe b. Ali nâm kimesnelerden istihbâr olundukda fi’l-vâki‘ müdde‘î-i mezbûrun menzil-i mezbûru ile merkūm Musli Beşe’nin sâkin olduğu menzil mukaddemâ mezbûr Mehmed Subaşı’nın mülkü olup târih-i merkūmda mezbûr Mehmed Subaşı mezbûr Musli Beşe’nin menzil-i mezbûrunu kendi menzilinden ifrâz ve alâmât-ı fâsıla vaz‘ eylediğinden sonra zikr olunan sokak kapısı beynlerinde müşterek olup menzileyn beyninde merkūm Musli Beşe’ye menziline gidecek hakk-ı mürûr ta‘yîn etmek üzre mezbûr Musli Beşe’ye on bin akçeye bâtten bey‘ ve teslîm ol dahi iştirâ ve tesellüm eyledi deyû vâki‘ hâli her biri alâ tarîki’ş-şehâde haber verdiklerinden sonra mi‘mâr-ı merkūm menzileyn-i mezbûreyn beyninde olan arsayı mesâha eyledikde tûlen on sekiz ve arzan dört bi hesâb-ı şatrancî yetmiş iki zirâ‘a bâliğ olan arsa menzileyn-i mezbûreyne ale’l-iştirâki’s-seviy hakk-ı mürûr ta‘yîn olunduğunu mevlânâ-yı mezbûr mahallinde ketb ve tahrîr ba‘dehû kendi ile ma‘an irsâl olunan Hüseyin b. Mirza ile gelip meclis-i şer‘de alâ vukū‘ihî inhâ ve takrîr etmeğin menzileyn-i mezbûreyn için iştirâk-i seviy üzre yetmiş iki zirâ‘ hakk-ı mürûr ta‘yîn olunan arsadan mâ‘adâ merkūm Emrullah Çelebi’nin menzili arsasına müdâhaleden merkūm Musli Beşe men‘ birle mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Ahmed Çelebi b. Mehmed, Mehmed Çelebi b. Ömer, Behram b. Abdullah, Siyavuş b. Abdullah, Mehmed b. Hüseyin, Dilâver Beşe b. Abdullah ve gayruhüm.