Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 350 Hüküm no: 449 Orijinal metin no: [68a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Beşe b. Mehmed’in Hüseyin Reis b. Receb aleyhindeki alacak davasının reddi Kayıkçı tâifesinden Mahmud Beşe b. Mehmed nâm kimesne mahfil-i kazâda işbu râfi‘ü’l-kitâb Hüseyin Reis b. Receb nâm kimesne mahzarında üzerine da‘vâ ve takrîr-i kelâm edip bundan akdem mezbûr Hüseyin Reis zimmetinde mâl-ı şirketden iki bin yedi yüz akçe hakkım olup meblağ-ı merkūmun iki bin iki yüz akçesini mukaddemâ merkūmun yedinden ahz ü kabz edip meblağ-ı bâkī beş yüz akçe zimmetinde kalmağla onu dahi mezbûrdan taleb ederim suâl olunsun dedikde gıbbe’s-suâl merkūm Hüseyin Reis cevâbında fi’l-vâki‘ müdde‘î-i merkūmun zimmetimde mâl-ı şirketden iki bin iki yüz akçe ve cihet-i merkūmeden beş yüz akçe ki cem‘an iki bin yedi yüz akçe hakkı olup lâkin meblağ-ı mezbûru müdde‘î-i merkūma bi’t-tamâm def‘ u teslîm, ol dahi vech-i mübeyyen üzre yedimden ahz ü kabz eylediğinden sonra mezbûr Mahmud Beşe târih-i kitâba gelince beynimizde nice ahz ü i‘tâ vâki‘ olmağla zimmetinde bir akçe ve bir habbe hakkım kalmayıp ahz u i‘tâya müte‘allik da‘vâdan zimmetini ibrâ ve iskāt eyledim dediği bin yetmiş üç senesi Zilka‘detü’ş-şerîfesinin on dördüncü gününde kasaba-i Tophâne mahkemesi’nde nâibü’ş-şer‘ olan mevlânâ Ali Efendi huzûrunda ikrâr ve yedime hüccet-i şer‘iyye dahi verilmişidi deyû mazmûnu min külli’l-vücûh takrîr-i meşrûhunu nâtık ve târih-i mezbûr ile müverraha hüccet-i şer‘iyye ibrâz edip müdde‘î-i mezbûrun muvâcehesinde feth ve kırâat olundukda mezbûr Mahmud Beşe mazmûn-ı hücceti münkir olucak mezbûr Hüseyin Reis’den mazmûn-ı hüccet-i merkūmeyi mübeyyine beyyine taleb olundukda zeyl-i kitâbda isimleri mastûr Mehmed Çelebi b. Yusuf ve Mehmed b. Mustafa nâm kimesneler li ecli’ş-şehâde meclis-i şer‘a hâzırân olup isre’l-istişhâd [68b] fi’l-hakīka merkūm Mahmud Beşe târih-i merkūmda mevlânâ-yı müşârün-ileyh meclisinde târih-i kitâba gelince beynimizde vâki‘ olan ahz [u] i‘tâya müte‘allik olan da‘vâdan mezbûr Hüseyin Reis’in zimmetini ibrâ ve iskāt eyledim deyû bizim huzûrumuzda ikrâr ve nâib-i mûmâ-ileyh vech-i muharrer üzre merkūm Mahmud Beşe’nin ikrârını ba‘de’t-tahrîr mezbûr Hüseyin Reis’in yedine hüccet-i şer‘iyye vermişdir. Biz bu mazmûn-ı hüccete şâhidleriz ve şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle müdde‘î-i merkūm bî-vech mu‘ârazadan men birle mâ vaka‘a bi’t-taleb ketb olundu. Fi’l-yevmi’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi b. Receb, el-Hâc Ramazan b. Ahmed, Muharrem b. Receb, Ebûbekir Beşe b. Fazlı, el-Hâc Kenan b. Abdullah.