Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 354 Hüküm no: 455 Orijinal metin no: [69a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Reis’in tasarruf hakkın devredilen tarla için şuf‘a hakkı davasının miri arazi olması dolayısıyla reddi Vilâyet-i Anadolu’da Onikidîvân kazâsına tâbi‘ Sazye nâm karye sâkinlerinden Hüseyin Reis b. İbrahim nâm kimesne mahfil-i kazâda zikri âtî tarlaya vâzı‘ü’l-yed olan bâ‘is-i hâze’l-kitâb [69b] Mehmed b. Muzaffer nâm kimesne mahzarında üzerine da‘vâ ve takrîr-i kelâm edip mezbûr Mehmed’in yedinde ve taht-ı tasarrufunda olup karye-i mezbûre sınırı dâhilinde vâki‘ bir tarafdan Kavaklı orman ve bir tarafdan Ömer nâm kimesne tarlası ve bir tarafdan Hasan Bey nâm kimesne tarlası ve bir tarafdan İbrahim nâm kimesne tarlası ile mahdûd bir kıt‘a tarla gāibûn ani’l-meclis Abdülkādir ve Muharrem ve Mustafa nâm kimesnelerin ale’l-iştirâki’s-seviy taht-ı tasarruflarında olmağla onlar dahi her biri hissesini beşer yüz akçeden cem‘an bin beş yüz akçeye zikr olunan tarlayı mezbûr Mehmed’e ma‘rifet-i sâhib-i arz ile ferâğ ve tefvîz ve bedel-i tefvîz olan meblağ-ı mezbûru ahz ü kabz etmişler idi lâkin zikr olunan tarla benim tarlama muttasıl olup ben şefî‘ olmağla ferâğ-ı merkūmu istimâ‘ ettiğim hînde bilâ-te’hîr taleb-i şuf‘a edip müslimîni işhâd etmişidim hâlâ taleb ederim suâl olunsun dedikde gıbbe’s-suâl mezbûr Mehmed cevâbında fi’l-vâki‘ zikr olunan tarla müdde‘î-i mezbûrun tarlasına muttasıl olup lâkin zikri mürûr eden tarla ar[z]-ı mîrî olup şer‘an ahkâm-ı şuf‘a câriye değildir deyû da‘vâ-yı def‘le mukābele edicek isre’l-istinkâk mezbûr Hüseyin sâlifü’z-zikr tarla arz-ı mîrî olduğunu i‘tirâf etmeğin arz-ı mîrîyede şuf‘a câriye olmamağın mûcebince mezbûr Hüseyin bî-vech taleb-i şuf‘adan men‘ birle mâ vaka‘a bi’t-taleb ketb olundu. Fi’l-yevmi’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Süleyman Beşe b. Abdünnebi, Gazanfer b. Receb, Receb Beşe b. Abdullah, Mustafa b. Receb, Halil ve gayruhüm.