Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 354 Hüküm no: 456 Orijinal metin no: [69b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Ahmed’in eşi Mehmed b. Himmet’den muhâlaa yoluyla boşandığı Mahmiye-i Galata hâricinde Bedreddin Bey mahallesi sâkinelerinden Hatice bt. Ahmed nâm hâtun meclis-i şer‘-i hatîr-i lâzımü’t-tevkīrde zevc-i muhâlı‘ı bâ‘is-i hâze’l-kitâb Mehmed b. Himmet nâm kimesne muvâcehesinde bi’t-tav‘i’s-sâf ikrâr ve takrîr-i kelâm edip zevcim mezbûr Mehmed zimmetinde mütekarrir ve ma‘kūdun aleyh olan altı bin akçe mehr-i müeccelimden fâriğa ve nafaka-i iddet-i mu‘ayyene-i ma‘lûmem ve me’ûnet-i süknâm dahi kendi üzerime olup ve mezbûr Mehmed’in firâşından hâsıl ve benden mütevellîde olup tahmînen dört yaşında olan sadriye sagīre kızım Afîfe’yi dahi dokuz yaşına varıncaya değin kendi malımdan infâk ve iksâ etmek üzre zevcim mezbûr ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra hukūk-ı zevciyyete müte‘allika cemî‘ de‘âvî ve mütâlebât ve eymân ve muhâsamâtdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’l-hâmis ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: El-Hâc Mehmed b. Receb, Abdülcelil b. ( ), Âbid b. Mustafa.