Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 355 Hüküm no: 457 Orijinal metin no: [69b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mustafa’nın tasarrufunda olan tarlanın kardeşi Mehmed b. Mustafa’ya verilmesi Mahrûsa-i Üsküdar’da Sultantepesi kurbunda sâkin işbu râfi‘ü’l-kitâb Mehmed b. Mustafa nâm kimesne mahfil-i kazâda vilâyet-i Anadolu’da Ginolu kazâsına tâbi‘ Ortadivan’da vâki‘ Küre nâm karye sükkânından Mahmud b. İbrahim mahzarında üzerine da‘vâ ve takrîr-i kelâm edip karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd bir kıt‘a tarla bundan akdem fevt olan karındaşım Mustafa nâm kimesnenin tasarrufunda olup ba‘de vefâtihî zikr olunan tarlanın kānûn üzre hakk-ı tapusu benim iken merkūm Mehmed sâlifü’z-zikr tarlayı sipâhisinden tapuladım deyû tasarruf eder, suâl olunup kasr-ı yed ve bana teslîme tenbîh matlûbumdur dedikde gıbbe’s-suâl merkūm Mehmed cevâbında mârrü’z-zikr tarlayı sipâhisinden tapulayıp aldığını ikrâr ve i‘tirâf etmeğin merkūm Mustafa fevt oldukda tasarrufunda olan tarlanın kānûn üzre hakk-ı tapusu merkūm Mehmed’in olmağla sâlifü’z-zikr tarladan merkūm Mehmed’in kasr-ı yedine ve müdde‘î-i mezbûra teslîmine tenbîh birle mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi b. Receb, Muharrem Beşe b. Receb, el-Hâc Sinan b. Ahmed, Mahmud b. Hasan, Mustafa b. Mehmed.