Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 356 Hüküm no: 459 Orijinal metin no: [70a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Dimitri, vefat eden Nikola v. Yani’de olan alacağını varislerinden tahsil ederek zimmetlerini ibra ettiği Mahmiye-i Galata dâhilinde Sultan Bayezid mahallesinde sâkin Yorgi v. Dimitri nâm zimmî mahfil-i kazâda mahalle-i mezbûrede sâkin iken bundan akdem hâlik olan Nikola v. Yani nâm zimmînin verâseti zevce-i metrûkesi Kokona bt. İstolaki nâm nasrâniye ile sulbiye kabîre kızları Arhondise ve Maryora’ya ve li ebeveyn er karındaşı İlya ile kız karındaşı Nikola’ya münhasıra olduğu şer‘an zâhir ve müte‘ayyin oldukdan sonra mezbûrât Kokona ve Arhondise ve Maryora ve Nikola nâm nasrâniye ile merkūm İlya tarafından ikrâr-ı âti’z-zikri tasdîka Manolaki v. Andonaki ve Todori v. Yani nâm zimmîler şehâdetleri ile şer‘an vekâleti sâbite olan Panayot v. Nikola nâm zimmî muvâcehesinde ikrâr ve takrîr-i kelâm edip târih-i kitâbdan dört sene mukaddem hâlik-i mezbûra hayâtda iken yüz altmış kıt‘a riyâlî guruş ikrâz ve teslîm edip kable’l-ahz hâlik olmağın meblağ-ı mezbûru muhallefâtına vaz‘-ı yed eden veresesinden taleb ve da‘vâ ve onlar dahi def‘ ile mukābele etmekle beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip meblağ-ı merkūmu verese-i mezbûre yedlerinden bi’t-tamâm ahz ü kabz edip mâ‘adâsından verese-i mezbûrenin zimmetlerini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Çavuş b. Abdülmennân, Receb Çavuş b. Muharrem, Mehmed Beşe b. Abdullah, Mahmud Çelebi b. Mustafa, Mustafa Çelebi b. Receb.