Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 727 Hüküm no: 940 Orijinal metin no: [112a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Ağa b. Abdullah’ın köle bahasından Hüseyin Ağa b. Mehmed’de alacağı kaldığı Mahmiye-i İstanbul’da Nahılbend mahallesinde sâkin işbu bâ‘isü’l-kitâb Yusuf Ağa b. Abdullah meclis-i şer‘-i hatîr-i lâzımü’t-tevkīrde Hüseyin Ağa b. Mehmed mahzarında üzerine da‘vâ ve takrîr-i kelâm edip târih-i kitâbdan beş sene mukaddem açık kaşlı, elâ gözlü, uzun boylu Efrenciyyü’l-asl Yusuf b. Abdullah nâm gulâmımı mezbûr Hüseyin Ağa’ya yüz esedî guruşa bey‘ ve teslîm ol dahi iştirâ ve tesellüm ve kabûl ve kabz eyledikden sonra semeni olan meblağ-ı mezbûr yüz esedî guruşu zimmetinde kalmışidi hâlâ taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda mahmiye-i mezbûrda Kalenderhâne’de sâkin Mehmed Ağa b. Yakub ve İbrahim Çelebi b. Abdullah ve Çelebioğlu mahallesinde sâkin Selim b. Osman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka târih-i kitâbdan beş sene mukaddem müdde‘î-i mezbûr Yusuf Ağa mevsûf-ı mezbûr Yusuf’u bizim huzûrumuzda mezbûr Hüseyin Ağa’ya yüz esedî guruşa bey‘ ve teslîm ol dahi vech-i mübeyyen üzre iştirâ ve kabûl ve kabz ve tesellüm eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı mezbûr yüz esedî guruşu müdde‘î-i mezbûra edâya mezbûr Hüseyin Ağa’ya tenbîh olunup ma-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: El-Hâc Siyavuş [b.] Abdullah, Abdi Çelebi b. ( ), Ahmed b. ( ), Mehmed Bey b. Abdullah.