Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 365 Hüküm no: 476 Orijinal metin no: [72a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Mehmed’in balık ağını parçaladığını iddia ettiği Süleyman Reis’e açtığı tazminat davasını ispatlayamadığı Balıkçı tâifesinden Ali b. Mehmed nâm kimesne mahfil-i kazâda işbu bâ‘isü’l-kitâb Süleyman Reis b. Hüseyin nâm kimesne muvâcehesinde üzerine da‘vâ ve takrîr-i kelâm edip mezbûr Süleyman Reis târih-i kitâb gecesi Mihaliç nâm kasaba iskelesinden Darbuna ta‘bîr olunur sefînesiyle mahmiye-i İstanbul’a gelirken balık sayd etmek için Ahırkapı kurbunda deryâya ilkā eylediğim bin beş yüz akçe kıymetli ağımın üzerine gelmek sadedinde deryâda ığrıb vardır üzerine gelme deyû haber vermişiken memnû‘ olmayıp amden zikr olunan ağımın üzerine sefînesi ile gelip ağımı pâreleyip amel ve intifâ‘dan kalmışdır hâlâ mezbûrdan suâl olunup te‘addîsi sebebiyle zikr olunan ağımın kıymetini mezbûra tazmîn ettirilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb oldukda ityân-ı beyyineden izhâr-ı aczile istihlâf etmeğin fi’l-vâki‘ târih-i kitâb gecesi müdde‘î-i mezbûrun balık sayd edecek ağını amden sefînesi ile üzerine gelip pârelemediğine mezbûr Süleyman Reis’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle müdde‘î-i mezbûr bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Eyüb Ağa Muhzırbaşı, Mustafa Çelebi b. Receb, el-Hâc Ramazan b. Mehmed, Ahmed Yazıcı b. Mehmed, Mehmed Çelebi er-Râcil ve gayruhüm.