Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 366 Hüküm no: 477 Orijinal metin no: [72a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Petro’nun, vefat eden babası Nikola v. Dimitri’nin terekesinden kendisine intikal eden hissesini teslim aldığı Mahmiye-i Galata’da Sultan Bayezid mahallesinde sâkin iken bundan akdem hâlik olan Nikola v. Dimitri nâm zimmînin verâseti zevce-i metrûkesi Marola bt. Durmuş nâm nasrâniye ile [72b] sulbî kebîr oğlu Petro nâm zimmîye ve sulbî sagīr oğlu Kanaki’ye münhasıra olduğu şer‘an zâhir ve mütehakkik oldukdan sonra mezbûr Petro meclis-i şer‘de sagīr-i mezbûrun tesviye-i umûruna kıbel-i şer‘den mansûb vasîsi ve merkūme Marola tarafından dahi husûs-ı âti’l-beyânı tasdîka vekîl olup bimâ hüve nehcü’s-sübût şer‘an vekâleti sâbite olan işbu râfi‘ü’l-kitâb Durmuş v. Petro nâm zimmî muvâcehesinde ikrâr ve takrîr-i kelâm edip babam hâlik-i mezbûrun muhallefâtından esâs-ı beyt ve evânî-i nühâsiyye ve gayr-ı nühâsiyye ve bi’l-cümle ismi mâl ıtlâk olunur eşyâsından hisse-i şer‘iyye-i ma‘lûmemi tereke-i hâlik-i mezbûra vâzı‘ü’l-yed oldukları hasebiyle vasiyy-i mezbûr Durmuş ile müvekkile-i mezbûre Marola yedlerinden tamâmen ahz ü kabz edip sâir hâlik-i mezbûrun muhallefâtına müte‘allika âmme-i de‘âvîden verese-i merkūmenin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selhi Zilhicceti’ş-şerîfe li sene selâse ve seb‘în ve elf. Şuhûdü’l-hâl: Ebûbekir Beşe b. Şaban Çukadâr, Hamza b. Abdülganî, Muharrem b. Receb, Mustafa b. Receb, Âbid b. Mustafa ve gayruhüm.