Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 367 Hüküm no: 479 Orijinal metin no: [72b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe’nin meyhaneci Kostantin, Trandafilo ve sairleri aleyhindeki darb ve para davasının reddedildiği Mahmiye-i İstanbul’da yeni odalar kurbunda sâkin Hüseyin Beşe b. Mehmed nâm kimesne meclis-i şer‘-i hatîr-i lâzımü’t-tevkīrde medîne-i Galata’da meyhâneci tâifesinden ashâb-ı hâze’s-sifr Kostantin v. Yani ve Trandafilo v. Yani ve Filo v. Yorgi ve İstati v. Dimitri nâm zimmîler muvâcehelerinde üzerlerine da‘vâ ve takrîr-i kelâm edip târih-i kitâbdan bir gün mukaddem mezbûrûn beni meyhânelerinde darb-ı şedîd ile darb eylediklerinden mâ‘adâ koynumdan bir kırmızı kese içinde mevcûd bin dört yüz eli akçemi hafiyyeten ahz ü kabz eylemişlerdir hâlâ taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin vech-i muharrer üzre müdde‘î-i mezbûru târih-i mezbûrda meyhânelerinde darb-ı şedîd ile darb ve koynundan bir kese içinde mevcûd bin dört yüz elli akçesin ahz ü kabz eylemediklerine mezbûrûn Kostantin ve Tarandalio ve Filo ve İstati’ye yemîn teklîf olundukda onlar dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin müdde‘î-i mezbûr bî-vech mu‘ârazadan men‘ birle mâ vaka‘a bi’t-taleb ketb olundu. Hurrire fî gurreti Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa b. Receb, Hüseyin b. Receb, Ahmed Yazıcı b. Mehmed, Âbid b. Mustafa.