Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 729 Hüküm no: 942 Orijinal metin no: [112b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Toros v. Asvador’un, cizyesini İstanbul’da ödediğinin tespiti Hayyât tâifesinden bâ‘isü’s-sifr Toros v. Asvador nâm zimmî mahfil-i kazâda vilâyet-i Anadolu’da Kemah kazâsına tâbi‘ İçdik? nâm karye ahâlîsinin târih-i kitâb senesi üzerlerine lâzım gelen cizyelerini cem‘a memûr olan ( ) Ağa tarafından husûs-ı âti’l-beyâna sâbitü’l-vekâle vekîl olan Mardiros v. Marat nâm zimmî muvâcehesinde takrîr-i kelâm edip ben ve babam ve dedem mahmiye-i İstanbul’da tevellüd edip üzerime lâzım gelen cizyemi her sene mahmiye-i mezbûrda edâ edip karye-i mezbûrede cizye defterine mukayyed değil iken mezbûr Mardiros senin cedd-i a‘lândan birisi karye-i mezbûre re‘âyâsından imiş deyû cizye talebiyle beni rencîde etmeden hâlî değildir suâl olunup vech-i muharrer üzre rencîde etmemek üzre merkūm Mardiros’a tenbîh olunmak matlûbumdur dedikde gıbbe’s-suâl mezbûr Mardiros kaziyye minvâl-i muharrer üzre olup mezbûr Toros’un baba ve dedesi karye-i mezbûrda tevellüd edip ismi karye-i mezbûrda cizye defterine mukayyed olmayıp her sene cizyesi mahmiye-i mezbûrdan cizye cem‘ edenlere veregeldiğini ikrâr etmeğin mûcebince mezbûr Mardiros bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis ve ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Hasan Çelebi b. Ahmed, Hüseyin Çelebi b. Ahmed, Mehmed Beşe b. Ramazan.