Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 370 Hüküm no: 485 Orijinal metin no: [73a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mühtedi Ali Beşe’nin demirci Mihal v. Petro aleyhindeki işçilik ücreti davasının reddedildiği Yedekçi tâifesinden Ali Beşe b. Abdullah nâm mühtedî mahfil-i kazâda mahrûsa-i Galata’da sâkin demirci tâifesinden işbu hâmilü’s-sifr Mihal v. Petro nâm zimmî muvâcehesinde üzerine da‘vâ ve takrîr-i kelâm edip bundan akdem mezbûr Mihal’e ücret kavl etmeksizin demircilik san‘atında doksan gün hizmet etmişidim hâlâ müddet-i merkūmede müstahık olduğum ecr-i misli merkūmdan taleb ederim suâl olunsun dedikde gıbbe’s-suâl merkūm Mihal cevâbında fi’l-vâki‘ müdde‘î-i merkūm mukaddemâ ber vech-i muharrer doksan [gün] hizmet etmişdir deyû ikrâr, lâkin hizmeti mukābelesinde mezbûrun üzerinde edâsı lâzım gelen cizyesi olan üç yüz akçeyi kendi emri ile cizyedâra edâ eylediğimden mâ‘adâ kendiye bir don, bir gömlek ve ba‘zı levâzımına dahi emri ile üç yüz akçe harc [u] sarf eylediğime binâen altı yüz akçe kendiye def‘ ve teslîm edip ve sâir ücrete müte‘allik da‘vâdan zimmetimi ibrâ eylemişidi deyû def‘ ile mukābele edicek gıbbe’l-istintâk ve’l-inkâr merkūm Mihal’den takrîr-i meşrûhuna mutâbıka beyyine taleb olundukda ityân-ı beyyineden izhâr-ı aczile istihlâf etmeğin fi’l-vâki‘ merkūm Mihal’den ber vech-i muharrer üzre hizmeti mukābelesinde emriyle ecr-i misli için [üç yüz] akçe cizyedâra vermekle bir don gömlek ve sâir levâzımına dahi kezâlik emri ile üç yüz akçe harc [u] sarf eylediği ecilden cem‘an altı yüz akçe [73b] mâ‘adâ ücrete müte‘allika da‘vâdan merkūm Mihal’in zimmetini ibrâ etmediğine yemîn teklîf olundukda nükûl etmeğin müdde‘î-i mezbûr bî-vech ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’s-sâlis mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Çelebi b. Receb, Hüseyin b. Mirza, Ahmed Yazıcı b. Mehmed, Emrullah b. Mehmed, Hüseyin b. Abdullah ve gayruhüm.