Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 370 Hüküm no: 486 Orijinal metin no: [73b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Ahmed’in menzilini İsmihan bt. Mahmud’a sattığı Mahmiye-i Galata müzâfâtından kasaba-i Kasımpaşa’da Bedreddin Bey mahallesinde sâkine Emine bt. Ahmed nâm hâtun mahfil-i kazâda bâ‘isetü hâzihi’l-vesîka İsmihan bt. Mahmud nâm hâtun muvâcehesinde bi tav‘ihâ ikrâr ve takrîr-i kelâm edip silk-i mülk-i sahîhimde münselik olup mahalle-i mezbûrede vâki‘ bir tarafdan Fâtıma Hâtun mülkü ve bir tarafdan Deli Hüseyin mülkü ve bir tarafdan kalafatçı Ali nâm kimesne mülkü ve bir tarafdan tarîk-i hâs ile mahdûd bir bâb tahtânî odayı ve kenîfi ve havluyu müştemil mülk menzilimi bi cümleti’t-tevâbi‘ ve’l-levâhık kâffeti’l-menâfi‘ ve’l-merâfık mezbûre İsmihan Hâtun’a beş bin fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr beş bin akçeyi merkūme İsmihan Hâtun’a hibe-i sahîha-i şer‘iyye ile hibe ve temlîk edip ol dahi meclis-i hibede ittihâb [ve] temellük [ve] kabûl eyledi ba‘de’l-yevm menzil-i mahdûd-ı mezkûr merkūme İsmihan Hâtun’un mülk-i müşterâsıdır keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Osman Efendi b. Mahmud el-İmâm, es-Seyyid Abdülganî Efendi b. Hüseyin el-İmâm, Receb b. Abdülkerim el-Müezzin, Mehmed Çelebi b. Ali, Mahmud Beşe b. Receb.