Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 371 Hüküm no: 488 Orijinal metin no: [73b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Nikola’ya olan borcunu ödemesi hususunda Yorgi v. Cuvan’a tenbihte bulunulduğu Kunduracı tâifesinden bâ‘is-i hâze’s-sifr Dimitri v. Nikola nâm zimmî meclis-i şer‘-i hatîr-i lâzımü’t-tevkīrde Yorgi v. Cuvan nâm zimmî muvâcehesinde üzerine da‘vâ ve takrîr-i kelâm edip mezbûr Yorgi zimmetinde cihet-i karz-ı şer‘îden bin yüz akçe hakkım olup hattâ meblağ-ı mezbûr vech-i muharrer üzre zimmetinde bana deyni olduğunu şuhûd mahzarında ikrâr dahi etmişdir hâlâ taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i nasârâdan Yorgi v. Andon ve Nikola v. Kiryako nâm zimmîler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Yorgi müdde‘î-i mezbûr Dimitri[’ye] cihet-i karz-ı şer‘îden zimmetimde vâcibü’l-edâ ve lâzımü’l-kazâ bin yüz akçe deynim vardır deyû bizim huzûrumuzda ikrâr ve i‘tirâf edip bizi işhâd eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle meblağ-ı mezbûru müdde‘î-i mezbûra edâya mezbûr Yorgi’ye tenbîh birle mâ vaka‘a bi’t-taleb ketb olundu. Hurrire fi’l-yevmi’r-râbi‘ mine’l-Muharremi’l-harâm li sene selâse ve seb‘în ve elf. Şuhûdü’l-hâl: Kenan Bey b. Abdullah, Mustafa Çelebi b. Receb, Ebûbekir Beşe b. Şaban, Eyüb Ağa,