Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 372 Hüküm no: 489 Orijinal metin no: [73b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Diyako v. Sofyanoz’un evini bey‘i bi’l-vefâ suretiyle Todori v. Dimo’ya sattığı Medîne-i Üsküdar müzâfâtından Gekvize nâhiyesine tâbi‘ Darıca nâm karye mahallâtından Ayaniko mahallesi sâkinlerinden Diyako v. Sofyanoz nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Todori v. Dimo nâm zimmî muvâcehesinde ikrâr ve takrîr-i kelâm edip silk-i mülk-i sahîhimde münselik olup mahalle-i mezbûrede vâki‘ bir tarafdan Odabaşı Ahmed Beşe mülkü ve bir tarafdan Kara Piyâle mülkü ve bir tarafdan Çörekçioğlu Dimitraki nâm zimmî mülkü ve bir tarafdan tarîk-i âm ile mahdûd fevkānî üç bâb odaları ve tahtânî bir bâb mahzeni ve havluyu ve zât-ı eşcâr-ı müsmire ve gayr-ı müsmire bahçeyi müştemil mülk menzilimi târih-i kitâbdan üç ay tamâmına değin bey‘ bi’l-vefâ tarîki ile mezbûr Todori’ye altı bin fıddî râyic fi’l-vakt akçeye bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr altı bin akçeyi yedinden bi’t-tamâm [74a] ve’l-kemâl ahz ü kabz eyledim, eğer meblağ-ı mezbûru müddet-i merkūme tamâmına değin mezbûra edâ ve teslîm etmezsem menzil-i mezkûru semen-i misli ile âhara bey‘a ve kabz-ı semene ve semeninden meblağ-ı mezbûru kabz ve istîfâya ve fazlayı bana îsâle azil ve in‘izâlden masûne vekâlet-i devriyye ile mezbûr Todori’yi tarafımdan vekîl ve nâib-i menâb nasb ve ta‘yîn edip ol dahi vekâlet-i merkūmeyi kabûl ve hizmet-i lâzımesini edâya müte‘ahhid oldu dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis mine’l-Muharremi’l-harâm li sene 1074. Şuhûdü’l-hâl: Ahmed Yazıcı b. Mehmed, Zülfikār b. İbrahim, Hasan b. Mirza, Mehmed Çelebi b. Abdi, Ebûbekir Beşe b. Şaban Çukadâr.