Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 373 Hüküm no: 490 Orijinal metin no: [74a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Kenan b. Abdullah’ın varislerinin kendilerine intikal eden cariye Canfidan’ı Hüseyin b. Abdullah’a sattıkları Mahrûsa-i Galata’ya tâbi‘ kasaba-i Kasımpaşa’da vâki‘ Sirkeci mahallesinde sâkin iken bundan akdem vefât eden Kenan Efendi b. Abdullah nâm kimesnenin sulbî oğlu Mehmed ile sulbiye kızı Afîfe nâm sagīrlerin kıbel-i şer‘-i enverden mansûb vasîleri olan umdetü’l-a‘yân Mustafa Bey b. Ulvan Kapudân meclis-i şer‘-i hatîr-i lâzımü’t-tevkīrde râfi‘-i hâze’l-kitâb Hüseyin b. Abdullah nâm kimesne mahzarında ikrâr ve takrîr-i kelâm edip sagīrân-ı merkūmânın babalarından irs-i şer‘le intikāl eden işbu uzun boylu açık kaşlı gök elâ gözlü Rusiyyetü’l-asl Canfeda bt. Abdullah nâm câriyeyi âhara bey‘ olunmak sagīrân markûmân haklarında her vechile evlâ ve enfa‘ olmağla ben dahi târih-i kitâbdan bir sene mukaddem mezbûr Hüseyin’e mevsûfe-i merkūme Canfeda’yı yüz altmış kıt‘a riyâlî guruşa bâtten bey‘ ve teslîm, ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı merkūmu târih-i merkūmda mezbûr Hüseyin yedinden bi’t-tamâm ve’l-kemâl ahz ü kabz edip mevsûfe-i mezbûre merkūm Hüseyin’in mülkü olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa b. el-Hâc Bayram. Mehmed Çelebi b. Mustafa el-Müderris, Nasuh b. Yusuf, Ahmed Çavuş b. Abdullah.