Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 373 Hüküm no: 491 Orijinal metin no: [74a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hanım’ın, Abdülfettah Çelebi b. Avni’den kendisine intikal eden ev hissesini Hacı Süleyman b. Abdullah’a sattığı Mahmiye-i Galata müzâfâtından Fındıklı’da Avni Efendi mahallesinde sâkin iken bundan akdem fevt olan Abdülfettâh Çelebi b. el-merhûm Avni Efendi’nin verâseti vâlidesi Ziba bt. Abdullah’a ve li üm kız karındaşı Fâtıma bt. ( ) ve li ebeveyn kız karındaşı Hibetullah’a ve li eb er karındaşları Mustafa ve Mehmed ve Abdülkādir ve Seyfullah ve Sunullah’a ve li eb kız karındaşları Âişe ve Safiye nâm hâtunlara münhasıra olduğu şer‘an zâhir ve mütehakkik ve müteveffâ-yı mezbûrun muhallefâtı veresesi beynlerinde yetmiş sekiz sehimden i‘tibâr olunup sihâm-ı mezbûreden on üç sehimi vâlidesi mezbûre Ziba’ya ve on üç sehimi mezbûre Fâtıma’ya ve otuz dokuz sehimi mezbûre Hibetullah’a ve karındaşları mezbûrûn Mustafa ve Mehmed ve Abdülkādir ve Seyfullah ve Sunullah’ın her birine ikişer sehim ve li eb karındaşları mezbûrûnun her birine birer sehim intikāl [ve] isâbet eylediği müte‘ayyin oldukdan sonra mezbûre Âişe tarafından bey‘-i âti’z-zikri ikrâra vekîl olup zât-ı mezbûreyi ma‘rifet-i şer‘iyye ile ârifân olan Hüseyin b. el-Hâc Ali ve Şaban b. Mustafa nâm kimesneler şehâdetleri ile şer‘an vekâleti sâbite olan Mustafa Beşe b. Halil mahfil-i kazâda işbu râfi‘ü’l-kitâb el-Hâc Süleyman b. Abdullah nâm kimesne mahzarında bi’l-vekâle ikrâr ve takrîr-i kelâm edip müteveffâ-yı mezbûrun muhallefâtından olup ba‘de vefâtihî irsen veresesine intikāl edip mahalle-i mezbûrede vâki‘ bir tarafdan merkūm el-Hâc Süleyman mülkü ve bir tarafdan tarîk-i âm ve iki tarafdan ba‘zan mezbûr Abdülkādir mülkü ve ba‘zan tarîk-i âm ile mahdûd fevkānî dört bâb odalar ve bir dehliz ve bir sofa ve bir su kuyusunu ve def‘a fevkānî bir oda ve tahtında bir matbah ve bir sofa ve bir köşk ve eşcâr-ı müsmireyi hâviye bahçe ve iki kenîfi müştemil mülk menzilde müvekkilem mezbûre kendiye intikāl eden bir sehm-i şâyi‘i merkūm el-Hâc Süleyman’a üç bin akçeye bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûru merkūm el-Hâc Süleyman yedinden bi’t-tamâm ahz ü kabz eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mehmed b. Ömer, Bayram b. ( ), Abdülkerim Çelebi b. Mehmed, Ahmed Yazıcı b. Mehmed, Mustafa Çelebi b. Receb, Âbid b. Mustafa ve gayruhüm.