Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 374 Hüküm no: 492 Orijinal metin no: [74a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın evini bey‘ bi’l-istiğlâl suretiyle Davud Ağa’nın Nakit Vakfına sattığı Mahmiye-i Galata’da Yolcuzâde mahallesinde sâkine Belkıs bt. Abdullah nâm hâtun meclis-i şer‘de mahmiye-i mezbûre hâricinde Saray-ı sultânîde vâki‘ merhûm Davud Ağa’nın nukūd-ı mevkūfesine bi’l-fi‘l mütevellî olan işbu râfi‘ü’l-kitâb Mustafa Çelebi b. Yusuf nâm kimesne muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafdan Medîne-i münevvere vakfı ve bir tarafdan Ahmed Bey mülkü ve iki tarafdan tarîk-i âm ile mahdûd üç bâb fevkānî ve bir bâb tahtânî odaları ve kenîfi ve havluyu müştemil olan mülk menzilimi mâl-ı vakf-ı mezbûr ile her bir guruşu sekizer dirhem olmak üzre merkūm Mustafa Çelebi’ye yüz kıt‘a riyâlî guruşa bi tarîki’l-istiğlâl bey‘ ve teslîm edip ol dahi vech-i muharrer üzre mâl-ı vakf-ı mezbûr ile iştirâ ve tesellüm eyledikden sonra mütevellî-i mezbûr Mustafa Çelebi menzil-i mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin on kıt‘a riyâlî guruş ücret ile bana îcâr [ve] teslîm edip ben dahi minvâl-i muharrer üzre istîcâr ve tesellüm eyledim dedikde [74b] gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Fahrü’l-kuzât Nasuh Efendi b. Yusuf, Mehmed Efendi b. Ali el-İmâm, fahrü’l-kuzât Şaban Efendi b. Sâdık, el-Hâc Cafer Bey b. Abdullah el-Bevvâb-ı sultânî, Mustafa Bey b. ( )