Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 375 Hüküm no: 493 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed’in, Abdülfettah Çelebi b. Avni’den kendisine intikal eden ev ve bahçe hissesini Hacı Süleyman b. Abdullah’a sattığı Mahmiye-i Galata müzâfâtından kasaba-i Fındıklı’da Avni Efendi mahallesinde sâkin iken bundan akdem fevt olan Abdülfettâh Çelebi b. el-merhûm Avni Efendi’nin verâseti vâlidesi Ziba bt. Abdullah ve li üm kız karındaşı Fâtıma bt. ( ) ve li ebeveyn kız karındaşı Hibetullah’a ve li eb er karındaşları Mustafa ve Mehmed ve Abdülkādir ve Seyfullah ve Sunullah’a ve li eb kız karındaşları Âişe ve Emine ve Safiye nâm hâtunlara münhasıra olduğu şer‘an zâhir ve mütehakkik ve müteveffâ-yı mezbûrun muhallefâtı veresesi beynlerinde yetmiş sekiz sehimden i‘tibâr olunup sihâm-ı mezbûreden on üç sehimi mezbûre Ziba’ya ve on üç sehimi mezbûre Fâtıma’ya ve otuz dokuz sehimi mezbûre Hibetullah’a ve karındaşları merkūmûn Mustafa ve Mehmed ve Abdülkādir ve Seyfullah ve Sunullah’ın her birine ikişer sehim intikāl ve isâbet eylediği müte‘ayyin oldukdan sonra merkūm Mehmed mahfil-i kazâda işbu râfi‘ü’l-kitâb el-Hâc Süleyman b. Abdullah nâm kimesne mahzarında ikrâr ve takrîr-i kelâm edip müteveffâ-yı mezbûrun muhallefâtından olup ba‘de vefâtihî irsen veresesine intikāl eden mahalle-i mezbûrede vâki‘ bir tarafdan merkūm el-Hâc Süleyman mülkü ve bir tarafdan tarîk-i âm ve iki tarafdan ba‘zan mezbûr Abdülkādir mülkü ve ba‘zan tarîk-i âm ile mahdûd fevkānî dört bâb odaları ve bir dehlizi ve bir sofa ve bir su kuyusunu def‘a fevkānî bir oda ve tahtında bir matbah ve bir sofa ve bir köşk ve eşcâr-ı müsmireyi hâviye bahçe ve iki kenîfi müştemil mülk menzilin yetmiş sekiz sehimden hisse-i irsiyyeme intikāl eden iki sehm-i şâyi‘ini tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm el-Hâc Süleyman’a dört bin sekiz yüz akçeye bey‘ ve teslîm, ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru mezbûrun yedinden bi’t-tamâm ahz ü kabz eyledim ba‘de’l-yevm menzil-i mahdûd-ı mezkûrda olan iki sehim hisse-i irsiyyem merkūm el-Hâc Süleyman’ın mülk-i müşterâsıdır keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mehmed b. Ömer, Bayram Beşe b. Yazıcı, Mustafa Beşe b. Halil, Abdülkerim Çelebi b. Mehmed, Ahmed Yazıcı b. Mehmed, Mustafa b. Receb ve gayruhüm.