Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 375 Hüküm no: 494 Orijinal metin no: [74b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Caniti’nin Harikopo Reis aleyhindeki alacak davasının reddedildiği Mellâh tâifesinden Yorgi v. Caniti nâm zimmî mahfil-i kazâda rüesâ tâifesinden işbu râfi‘ü’s-sifr Harikopo Reis v. Oparino nâm zimmî muvâcehesinde üzerine da‘vâ ve takrîr-i kelâm edip mezbûr Harikopo Reis zimmetinde cihet-i karz-ı şer‘îden dokuz guruş ile altı aded frengî altın ve Mısır seferinde hâsıl olan fâideden benim payıma isâbet eden yirmi bir guruş ve emri ile yelkenciye ve direk başı için verdiğim iki guruş ve yine emri ile sefînesine harc [u] sarf eylediğim bin akçe ki cem‘an elli yedi esedî guruş ile altı altın ve bin akçe ve hakkım olup meblağûn-ı mezbûrûnun otuz üç buçuk esedî guruşunu mezbûrun ba‘de külli hesâb pirinç navlundan ve karz-ı şer‘îden zimmetimde zuhûr eden otuz üç buçuk guruş hakkına takās ol dahi mukāssa ve kabûl edip zimmetinde yirmi üç buçuk esedî guruş ile altı altın ve bin akçe hakkım kalmışdır, hâlâ mezbûrdan taleb ederim suâl olunsun dedikde gıbbe’s-suâl mezbûr Harikopo Reis cevâbında müdde‘î-i mezbûra cihet-i karzdan ancak bir guruş ve zikr olunan Mısır seferinden hâsıl olan fâideden payına isâbet eden yirmi bir guruş ve emrim ile yelkenciye ve direk başı için verdiği guruş ki cem‘an yirmi dört esedî guruş zimmetimde deynim olmağla, meblağ-ı mezbûr dahi zimmetimde deynim olmağla meblağ-ı mezbûr dahi zimmetinde bana deyni olan otuz üç buçuk esedî guruşun yirmi dört esedî guruşuna ber vech-i muharrer takās olunmağla zimmetim berî olmuşdur deyû ziyâde otuz üç esedî guruş ile altı altın ve bin akçe deyni olduğunu inkâr edicek, müdde‘î-i mezbûrdan ziyâde müdde‘âsını mübeyyine beyyine taleb olundukda ityân-ı beyyineden izhâr-ı aczile istihlâf etmeğin fi’l-vâki‘ müdde‘î-i mezbûra minvâl-i meşrûh üzre ziyâde otuz üç esedî guruş ile altı aded frengî altın ve bin akçe el-ân zimmetinde deyni olmadığına merkūm Harikopo Reis’e yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebiyle müdde‘î-i mezbûr bilâ-beyyine bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâdis min Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Çelebi [b.] Receb, Ahmed Yazıcı b. Mehmed, Âbid b. Mustafa, Hüseyin b. Abdullah, Muharrem b. Receb, el-Hâc Ramazan b. Mehmed ve gayruhüm.