Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 376 Hüküm no: 495 Orijinal metin no: [75a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Ahmed’in, kocasından intikal eden mirası alan vekili Osman Çelebi’nin zimmetini ibra ettiği Mahmiye-i Galata dâhilinde Câmi‘-i Kebîr mahallesinde sâkine Âişe bt. Ahmed nâm hâtun mahfil-i kazâda mahalle-i mezbûrede sâkin işbu râfi‘ü’l-kitâb Osman Çelebi b. el-Hâc Yusuf nâm kimesne mahzarında ikrâr ve takrîr-i kelâm edip zevcim iken bundan akdem fevt olan Mehmed b. Abdullah’ın benden gayrı zâhirde vâris-i ma‘rûfu olmamağla mecmû‘ muhallefâtını mahmiye-i mezbûrede bi’l-fi‘l beytülmâl emîni olan Siyavuş Ağa kabz eyledikde ben dahi zevcim müteveffâ-yı mezbûrun zimmetinde mütekarrir mehr-i müeccelim olan elli kıt‘a riyâlî guruş ile muhallefâtından hisse-i irsiyyemi emîn-i mezbûrdan taleb ve ahz ü kabza ve bana îsâle mukaddemâ mezbûru vekîl etmekle ol dahi ba‘de’l-kabûl rub‘ hisse-i irsiyyeme isâbet eden on bin iki yüz akçe ile meblağ-ı merkūm elli kıt‘a riyâlî guruş mihr-i müeccelimi emîn-i müşârün-ileyh yedinden bi’t-tamâm ahz ü kabz eylemişidi hâlâ meblağayn-ı mezbûreyni vekîlim mezbûr Osman Çelebi yedinden bi’t-tamâm ve’l-kemâl ahz ü kabz edip min ba‘d hisse-i irsiyyem olan on bin iki yüz beş akçe ile mehr-i müeccelim olan elli guruşdan merkūm Osman Çelebi’nin yedinde bir akçe ve bir habbe hakkım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: El-Hâc Ali b. Mehmed, İbrahim Çelebi b. Ali, el-Hâc Kasım b. Abdullah, üstâd İsmail b. Mehmed, Ahmed Yazıcı b. Mehmed ve gayruhüm.