Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 377 Hüküm no: 496 Orijinal metin no: [75a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harikopo Reis’in gemisindeki gemicilerin Mısır’dan getirdikleri malın satışından paylarını aldıklarının beyanı Mellâh tâifesinden Kaliko v. Kalamati ve İstemad v. Yorgi ve Panayot v. İskarlato ve Hristo v. Dimitri ve Yorgi v. Sakal, ve Panayot v. Yani ve Kostantin v. Petro ve Maliko v. Yani ve Yorgi v. Nikola ve Yorgi v. Yani ve Nikola v. Yorgi v. Yani ve Dimitri v. Kosta ve Panayot v. Colaki ve Todori v. Nikola ve Nikola v. Yani ve Yorgi v. Yani ve Dimo v. Mihal ve Mihal v. Yani ve sâirleri meclis-i şer‘de reisleri olan işbu bâ‘isü’s-sifr Harikopo Reis v. Oparino nâm zimmî muvâcehesinde üzerine her biri ikrâr ve takrîr-i kelâm edip târih-i kitâb senesinde mezbûr Harikopo Reis sefînesiyle Mısır’a sefer edip mahrûsa-i İstanbul’a geldiğimizde hâsıl olan fâideden ve navuldan beynimizde hesâb kitâb olundukda mellâhîne isâbet eden meblağdan yüz kıt‘a riyâlî guruş ifrâz ve reis-i mezbûrun yedine def‘ ve teslîm edip mâ‘adâsını her birimiz bi kadri’l-hısas ahz ü kabz etmişidik. El-hâletü hâzihî meblağ-ı mezbûr yüz kıt‘a riyâlî guruşu dahi mezbûrun yedinden tamâmen ahz ü kabz eyledik, min ba‘d meblağ-ı mezbûrdan ve sefer-i merkūmdan her birimize isâbet eden payımızdan merkūm reisin yedinde bir akçe ve bir habbe kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: El-Hâc Ramazan b. Mehmed, Kenan Bey b. Abdullah, Mustafa Çelebi b. Receb, Ahmed Yazıcı b. Mehmed, Hüseyin b. Mirza ve gayruhüm.