Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 378 Hüküm no: 497 Orijinal metin no: [75a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saki v. Yani’nin buğday satışından Foti v. Hristo’ya borcu olduğu Tüccâr tâifesinden işbu bâ‘isü’s-sifr Foti v. Hristo nâm zimmî meclis-i şer‘de yine tâife-i mezbûreden Saki v. Yani nâm zimmî muvâcehesinde üzerine da‘vâ ve takrîr-i kelâm edip mezbûr Saki zimmetinde her keyli altmışar akçeye olmak üzre yedimden müşterâ ve makbûz yüz keyl buğday bahâsından altı bin akçe hakkım zimmetinde olup meblağ-ı mezbûrun dört bin akçesini mukaddemâ yedinden ahz ü kabz edip iki bin akçe hakkım zimmetinde kalmışidi, hâlâ meblağ-ı bâkī iki bin akçesi bâkī kalmışidi taleb ederim, suâl olunsun dedikde gıbbe’s-suâl mezbûr Saki cevâbında fi’l-vâki‘ müdde‘î-i mezbûra minvâl-i meşrûh üzre yüz keyl buğday bahâsından bâkī iki bin akçe zimmetimde lâzımü’l-kazâ ve vâcibü’l-edâ deynim vardır deyû bi tav‘ihî ikrâr ve i‘tirâf etmeğin mûcebiyle meblağ-ı mezbûr iki bin akçeyi müdde‘î-i mezbûra edâya mezbûr Saki’ye tenbîh birle mâ vaka‘a bi’t-taleb ketb olundu. Fi’l-yevmi’s-sâdis min Muharremi’l-harâm li sene erba‘a ve seb‘în ve elf. Şuhûdü’l-hâl: Ebûbekir Beşe b. Mehmed, el-Hâc Ramazan b. Mehmed, el-Hâc Sefer Bey Ser-muhzırân, Mustafa Çelebi b. Receb, Hüseyin b. Mirza ve gayruhüm.