Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 378 Hüküm no: 498 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Resul Efendi’ye şayka kayığı satışından kalan borcunu ödemesi hususunda Hüseyin Reis b. Abdullah’a tenbihte bulunulduğu Vilâyet-i Anadolu’da Hoşalay kazâsına tâbi‘ Uğurlu nâm karye sâkinlerinden bâ‘is-i hâze’l-kitâb fahrü’l-kuzât Resul Efendi b. Mehmed nâm kimesne meclis-i şer‘-i şerîf-i lâzımü’t-teşrîfde rüesâ tâifesinden Hüseyin Reis b. Abdullah nâm kimesne tarafından husûmet ve redd-i cevâba vekîl-i müsecceli olan el-Hâc Halil Beşe b. Ahmed nâm kimesne muvâcehesinde üzerine da‘vâ ve takrîr-i kelâm edip târih-i kitâbdan on beş gün mukaddem mahmiye-i Galata hısnı ebvâbından Kürkçükapısı hâricinde Kalafatyeri demekle ma‘rûf iskelede merbût olup örf-i mellâhînde şayka ta‘bîr olunur yirmi zirâ‘ mülk sefînemi âlât-ı lâzımesiyle müvekkil-i mezbûr Hüseyin Reis’e fıddî râyic fi’l-vakt seksen bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûrun iki yüz akçesini bundan akdem yedinden ahz ü kabz edip yetmiş dokuz bin sekiz yüz akçe hakkım zimmetinde kalmışidi, hâlâ meblağ-ı bâkī yetmiş dokuz bin sekiz yüz akçeyi müvekkil-i mezbûrdan taleb ederim, vekîl-i merkūmdan suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden olup mahrûsa-i İstanbul’da Unkapanı kurbunda Sâlih Paşa mahallesinde sâkin Mehmed Efendi b. Mehmed Efendi el-İmâm ve Süleyman Bey b. Mustafa ve İsmihan Bey b. Mustafa nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-hakīka târih-i mezbûrda müdde‘î-i mezbûr Resul Efendi zikr olunan iskelede merbût olan şayka ta‘bîr olunur yirmi zirâ‘ mülk sefînesini âlât-ı lâzımesiyle müvekkil-i mezbûr Hüseyin Reis’e seksen bin akçeye bizim huzûrumuzda tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri hayyiz-i kabûle vâkı‘a olmağın mûcebiyle meblağ-ı bâkī yetmiş dokuz bin sekiz yüz akçeyi müdde‘î-i mezbûr Resul Efendi’ye edâ ve teslîme vekîl-i mezbûr el-Hâc Halil’e tenbîh birle mâ vaka‘a bi’t-taleb ketb olundu. Hurrire fi’l-yevmi’s-sâdis mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Nasuh Efendi b. Yusuf, Mustafa Çelebi b. Receb, Abdülkerim Efendi b. Mehmed, Şaban Bey b. Abdullah.