Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 379 Hüküm no: 499 Orijinal metin no: [75b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Hacı Abdi’nin kölesi Semen bt. Kader’i sözleşmeli olarak azat ettiği Mahmiye-i Galata dâhilinde Emekyemez mahallesinde sâkin Ahmed Çelebi b. el-Hâc Abdi Mehmed nâm kimesne tarafından ıtk-ı âti’l-beyânı ikrâra vekîl olup hasm-ı şer‘î-i câhid mahzarında Danyal b. Musa ve el-Hâc İsa b. Mehmed nâm kimesne şehâdetleri ile şer‘an vekâleti sâbite olan es-Seyyid Haşim Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde müvekkil-i mezbûre mukaddemâ rıkkını mu‘terif olan işbu açık kaşlı gök elâ gözlü uzun boylu Rusiyyü’l-asl râfi‘-i hâze’s-sifr Semen v. Kader mahzarında bi’l-vekâle ikrâr ve takrîr-i kelâm edip müvekkilim mezbûr Ahmed Çelebi bundan akdem mevsûf-ı merkūmu kendiye on sekiz bin akçe bedel vermek üzre kitâbete kat‘ etmeğin hâlâ müvekkil-i mezbûr bedel-i kitâbet olan meblağ-ı mezbûr on sekiz bin akçeyi mevsûf-ı mezbûrun yedinden bi’t-tamâm ve’l-kemâl ahz ü kabz eyledi, ba‘de’l-yevm mevsûf-ı mezbûr Semen sâir ahrâr-ı asliyyîn gibi hür olup üzerinde müvekkilimin velâ-i şer‘îden [gayrı] hakkı kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâmin mine’l-Muharremi’l-harâm li sene selâse ve seb‘în ve elf. Şuhûdü’l-hâl: Mustafa Kapudân [b.] Mahmud Efendi, Ali b. Abdullah, Mehmed Çelebi b. ( ), Mustafa b. Receb.