Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 380 Hüküm no: 500 Orijinal metin no: [75b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad v. Manuk’un ev hissesini kardeşi Asvador’a satması Mahmiye-i Galata dâhilinde Sultan Bayezid mahallesinde sâkin iken bundan akdem hâlik olan Manuk v. Kelhoş nâm Ermeni’nin verâseti sulbî oğulları Murad ve Asvador’a münhasıra olduğu şer‘an zâhir oldukdan sonra mezbûr Murad meclis-i şer‘-i şerîfde işbu râfi‘ü’s-sifr merkūm Asvador muvâcehesinde bi’t-tav‘i’s-sâf ikrâr ve takrîr-i kelâm edip mahalle-i mezbûrede vâki‘ bir tarafdan Hasan Çavuş mülküne ve bir tarafdan Agop mülküne ve bir tarafdan tarîk-i âm ile mahdûd iki bâb fevkānî ve iki bâb tahtânî odaları ve iki mahzeni ve bir tahta-pûşu ve bi’r-i mâ’ ve kenîfi ve havluyu müştemil olan menzil babamız hâlik-i mezbûrun mülkü olup ba‘de helâkihî menzil-i mezbûrun nısf-ı şâyi‘i bana ve nısf-ı şâyi‘-i âharı mezbûr Asvador’a irs-i şer‘le intikāl edip mülkümüz olmağla hâlâ menzil-i mezbûrdan mülküm olan nısf-ı şâyi‘-i mezbûru bi cümleti’t-tevâbi‘ ve’l-levâhık mezbûr Asvador’a altı yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûr altı yüz guruşu mezbûr Asvador’un yedinden tamâmen ahz ü kabz eyledim, ba‘de’l-yevm zikr olunan menzil-i mezbûrun nısf-ı şâyi‘i mülk-i mevrûsu ve nısf-ı şâyi‘-i âharı dahi mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Efendi b. Musa el-İmâm, Mustafa Çavuş b. Abdullah, Mehmed Çelebi b. el-Hâc Mustafa, Abdi Çelebi b. el-Hâc Mustafa, Abdi Çelebi b. İbrahim.