Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 730 Hüküm no: 944 Orijinal metin no: [112b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çavuş b. Abdullah’ın sandığından eşyalarını alan damadı Ahmed b. Mehmed’in eşyaları geri vermesi Mahmiye-i İstanbul’da Tahtaminâre mahallesi sâkinlerinden fahrü’l-eşbâh Mustafa Çavuş b. Abdullah nâm kimesne meclis-i şer‘-i şerîfde dâmâdı Ahmed b. Mehmed nâm kimesne mahzarında üzerine da‘vâ ve takrîr-i kelâm edip mezbûr Ahmed Çelebi fuzûlen sandığımı açıp içinden bir beyaz mukaddem kuşağımı ve bir mâî çukaya kaplı sansar paçası kürkümü ve bin iki yüz elli aded nakid akçe ve on beş buçuk kıt‘a esedî guruşumu ve yirmi guruş kıymetli bir akreb sâ‘atimi gasb etmişdir suâl olunup eşyâ-i mezkûre-i mevcûdenin merkūm Ahmed Çelebi’den alıverilmesi matlûbumdur dedikde gıbbe’s-suâl mezbûr Ahmed Çelebi zikr olunan beyaz mukaddem kuşak ve mâî çukaya kaplı sansar parçası kürkü ve bin iki yüz elli aded nakid akçeyi ve on beş buçuk kıt‘a esedî guruşu vech-i muharrer üzre ahz edip elân yedinde mevcûd idiğini ikrâr edip zikr olunan akreb sâ‘ati mukaddemâ bana hibe-i sahîha-i şer‘iyye ile hibe ve teslîm edip ben dahi meclis-i hibede ittihâb ve kabz etmekle mülk-i mevhûbum olmağın ahz etmiş idim deyip müdde‘î-i mezbûru ba‘zı da‘vâsında def‘le mukābele edicek gıbbe’l-istintâk ve’l-inkâr mezbûr Ahmed Çelebi’den def‘-i mezbûru mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Mustafa Çavuş’a zikr olunan akreb sâ‘atini mezbûr Ahmed Çelebi’ye hibe-i sahîha-i şer‘iyye [ile] hibe ve teslîm etmediğine yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince zikr olunan akreb sâ‘atin aynı mevcûd ise aynı, değil ise kıymet-i şer‘iyyesini ve zikr olunan beyaz mukaddem kuşak ile mâî çukaya kaplı sansar parçası kürkü ve bin iki yüz elli aded nakid akçe ve on beş buçuk kıt‘a esedî guruşun emsâlini alâ mûcebi ikrârihî müdde‘î-i mezbûr Mustafa Çavuş’a def‘ ve teslîme merkūm Ahmed Çelebi’ye ba‘de’t-tenbîh mâ vaka‘a bi’t-taleb ketb olundu. Fî yevmi’s-sâlis ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Receb Çavuş b. Mustafa, es-Seyyid Hüseyin Çelebi b. Hüseyin, Abdi Çelebi b. Hasan, İbrahim Çelebi b. Ahmed.