Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 381 Hüküm no: 502 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dağlı Reis’in ortağı Mustafa Reis’le olan fesih davasında Mustafa Reis’in zimmetini ibra etmesi Mellâh tâifesinden Dağlı Reis v. Andon nâm zimmî mahfil-i kazâda işbu râfi‘ü’l-kitâb Mustafa Reis b. Mehmed nâm kimesne mahzarında ikrâr ve takrîr-i kelâm edip merkūm Mustafa Reis ile mukaddemâ sefîne şerîkleri olup ba‘de fesh-i şirket eylediğimizde asl-ı mâl ve fâide[den] mezbûrun zimmetinde bir akçe ve bir habbe hakkım olmadığından mâ‘adâ mezbûr Mustafa Reis ile iştirâk üzre mutasarrıf olduğumuz sefîne ile Karadeniz’e sefer eylediğinde Çingene nâm kasaba önünde fırtına isâbet edip bi emrillâhi te‘âlâ sefînemiz helâk olmağla sefîne-i merkūmenin ba‘zı âlât-ı lâzımesin tahlîs etmekle bundan akdem Reis-i merkūmdan hisse-i şer‘iyyemi da‘vâ ve taleb eylediğimde ol dahi inkâr etmekle beynimizde münâza‘ât-ı kesîre vâkı‘a olmuşidi el-hâletü hâzihî da‘vâ-yı mezkûrumdan fâriğ olup husûs-ı şirkete müte‘allika târih-i kitâba gelince beynimizde cereyân eden ahz ü i‘tâ ve mütâlebât-ı şettâya müte‘allik da‘vâdan mezbûr Mustafa Reis’in zimmetini ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Hurrire fi’l-yevmi’s-sânî mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Ehl-i Hibre Mustafa Kapudân b. Musa, Mehmed Çelebi b. Abdullah, el-Hâc Yusuf b. Abdullah, el-Hâc Süleyman b. İbrahim, Mustafa Kapudân b. Murad, Osman Çelebi b. el-Hâc Yusuf, el-Hâc Ramazan b. Ahmed, Abdullah b. Mahmud, el-Hâc İbrahim b. Abdullah, el-Hâc Celil b. ( ), Mustafa b. Receb, Ahmed Yazıcı b. Mehmed.