Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 381 Hüküm no: 503 Orijinal metin no: [76a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gemici Hüseyin b. Hamza’nın Mustafa Reis’de olan alacağını tahsil ettiği Gemici tâifesinden Hüseyin b. Hamza nâm kimesne mahfil-i kazâda sefîne reislerinden işbu râfi‘ü’l-kitâb Mustafa Reis b. ( ) nâm kimesne mahzarında ikrâr ve takrîr-i kelâm edip ben reis-i mezbûrun sefînesinde ücret ile dört ay hizmet edip dört aylık ücretim hesâb olundukda bin üç yüz doksan akçeye bâliğ olmağın hâlâ dört aylık ücretim olan bin üç yüz akçe ücretimi reis-i mezbûrun yedinden bi’t-tamâm ahz ü kabz eyledim, min ba‘d dört aylık ücretimden reis-i mezbûrun yedinde bir akçe ve bir habbe hakkım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa Çelebi b. Receb, Ahmed Yazıcı b. Mehmed, Emrullah b. Mehmed, Hamza b. Abdülganî ve gayruhüm.