Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 383 Hüküm no: 507 Orijinal metin no: [76b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüseyin’e olan borcunu ödemesi hususunda İsmihan bt. Rüstem’e tenbihte bulunulduğu Mahmiye-i İstanbul’da Emir Şerif mahallesinde sâkine Fâtıma bt. Hüseyin nâm hâtun meclis-i şer‘-i hatîr-i lâzımü’t-tevkīrde kasaba-i Kasımpaşa’da el-Hâc Ahmed mahallesinde sâkine İsmihan bt. Rüstem nâm hâtun muvâcehesinde üzerine da‘vâ ve takrîr-i kelâm edip merkūme İsmihan zimmetinde cihet-i karz-ı şer‘îden dört şerîfî altın ve yedi esedî guruş ve bir riyâlî guruş ve yirmi hurda akçe hakkım vardır suâl olunup alıverilmesi matlûbumdur dedikde gıbbe’s-suâl merkūme İsmihan Hâtun cevâbında fi’l-vâki‘ vech-i muharrer üzre mezbûre Fâtıma Hâtun’a cihet-i merkūmeden dört şerîfî altın ve yedi esedî guruş ve yirmi hurda akçe zimmetimde lâzımü’l-edâ vâcibü’l-kazâ deynim vardır deyû bi tav‘ihâ ikrâr ve i‘tirâf etmeğin mûcebiyle meblağ-ı mezbûrun edâsıyla merkūme İsmihan ilzâm olunup mâ vaka‘a bi’t-taleb ketb olundu. Fi’l-yevmi’t-tâsi‘ mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Ebûbekir Beşe b. Şaban Çukadâr, el-Hâc Ramazan b. Mehmed, Mustafa Çelebi b. Receb, Hüseyin b. Mirza ve gayruhüm.