Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 383 Hüküm no: 508 Orijinal metin no: [76b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi’nin Mihal v. Yorgi’ye olan borcunu ödemesi gerektiği Mahrûsa-i Galata’da Sultan Bayezid mahallesinde sâkin işbu hâmilü’s-sifr Mihal v. Yorgi nâm zimmî muvâcehesinde üzerine da‘vâ ve takrîr-i kelâm edip merkūm Yorgi zimmetinde cihet-i karz-ı şer‘îden bin yedi yüz akçe hakkım vardır meblağ-ı merkūmun yüz elli akçesini mukaddemâ yedinden ahz ü kabz edip meblağ-ı bâkī bin beş yüz elli akçesi zimmetinde kalmağla meblağ-ı mezbûru merkūmdan taleb ederim suâl olunsun dedikde gıbbe’s-suâl merkūm Yorgi cevâbında fi’l-hakīka müdde‘î-i merkūmun zimmetinde ancak yedi yüz akçe hakkı olup lâkin meblağ-ı mezbûru müdde‘î-i merkūma bi’t-tamâm def‘ ve teslîm eyledim deyicek gıbbe’l-istintâk ve’l-inkâr mezbûr Yorgi’den yedi yüz akçe def‘ini mübeyyine beyyine taleb olundukda ityân-ı beyyineden izhâr-ı aczile istihlâf etmeğin fi’l-hakīka meblağ-ı mezbûr yedi yüz akçeyi ahz ü kabz etmediğine merkūm Mihal’e yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebiyle müdde‘î-i mezbûrun kabzına i‘tirâf eylediği yüz elli akçeden bâkī [bin] beş yüz elli akçenin edâsıyla merkūm Yorgi ilzâm olunup mâ vaka‘a bi’t-taleb ketb olundu. Fi’l-yevmi’r-râbi‘ mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Zülfikār b. İbrahim, Mustafa b. Receb, Muharrem b. Mehmed, Ahmed Yazıcı b. Mehmed, Âbid b. Mustafa ve gayruhüm.