Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 384 Hüküm no: 510 Orijinal metin no: [77a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Derviş’in haksız olarak elkoyduğu arsayı sahibi Mustafa b. Yusuf’a teslim etmesi Vilâyet-i Anadolu’da Samsun kazâsına tâbi‘ Şehabeddin nâm karye sükkânından işbu bâ‘isü’l-kitâb Mustafa b. Yusuf nâm kimesne meclis-i şer‘-i hatîr-i lâzımü’t-tevkīrde yine karye-i mezbûrede sâkin Mehmed Efendi b. Derviş nâm kimesne mahzarında üzerine da‘vâ ve takrîr-i kelâm edip karye-i mezbûrede Serim kurbunda vâki‘ iki tarafdan kendi mülküm ve iki tarafdan mezbûr Mehmed Efendi’nin mülkü ile mahdûd arsa-i hâliyemi mezbûr Mehmed Efendi fuzûlen zabt ve tasarruf eder, suâl olunup kasr-ı yedine tenbîh olunmak murâdımdır dedikde gıbbe’s-suâl mezbûr Mehmed Efendi cevâbında mârrü’z-zikr arsa müdde‘î-i mezbûrun olduğunu ve kendi dahi fuzûlen zabt ve tasarrufunu bi tav‘ihî ikrâr ve i‘tirâf etmeğin mûcebiyle zikr olunan arsadan kasr-ı yedine tenbîh birle mâ vaka‘a bi’t-taleb ketb olundu. Hurrire fi’l-yevmi’l-hâmis mine’l- Muharremi’l-harâm li sene erba‘a ve seb‘în ve elf Şuhûdü’l-hâl: Hamza b. Abdülganî, Mustafa b. Receb, Ahmed Yazıcı b. Mehmed, Siyavuş b. Abdullah.