Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 385 Hüküm no: 511 Orijinal metin no: [77a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostanti v. Papafil ve sairlerinin vakıf arsası üzerine bina eylediği evin inşasıyla ilgili keşif Mahmiye-i Galata’da Sultan Bayezid mahallesinde sâkin Kostanti v. Papafil ve Yanaki v. Trandafilo ve Kiryako v. Panayot nâm zimmîler meclis-i şer‘-i şerîfe gelip her biri takrîr-i kelâm ve bast-ı merâm edip Kâtib Mehmed Çelebi evkāfından olup mahalle-i mezbûrede vâki‘ bir tarafdan Nikola Morina ile ( ) nâm zimmîler tasarruflarında olan ve bir tarafdan Varti Yakomi mülkü ve iki tarafdan tarîk-i âm ile mahdûd tûlen yirmi bir buçuk ve arzan dokuz buçuk bi hesâbı şatrancî iki yüz dört zirâ‘ icâre-i müeccele ve mu‘accele ile tasarrufumuzda olan arsanın üzerine fevkānî ve tahtânî binâ ihdâs eylediğimizde civârımızda sâkin olup işbu hâzırân bi’l-meclis olan demirci Yanaki ve varilci Yakomi nâm zimmîler fevkānîde binâ eylediğimiz on dört direk ve yedi taban ve bir kirişi bi gayr-ı vech-i şer‘î fuzûlen kal‘ eylemişlerdir, hâlâ cânib-i şer‘den üzerine varılıp ba‘de’n-nazar kal‘ olunan ebniye müşâhede ve mu‘âyene olunup tahrîr olunması matlûbumdur dediklerinde savb-ı şer‘den mevlânâ Nasuh Efendi irsâl olunup ol dahi zeyl-i kitâbda mastûrü’l-esâmî olan müslimîn ile arsa-i mezkûre üzerinde ihdâs eyledikleri ebniye üzerine varıp nazar eylediklerinde arsa-i mezkûre üzerine binâ eyledikleri menzilin fevkānîsinde mebnî olan on dört direk ve yedi taban ve bir kiriş kal‘ olunduğunu mu‘âyene ve müşâhede ettiklerinden sonra vâki‘ hâli mevlânâ-yı mezkûr mahallinde tahrîr ve ba‘dehû ma‘an irsâl olunan Çukadâr Ebûbekir Beşe ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mehmed Beşe b. Abdullah el-Hallâk, Abdurrahman b. Yusuf, Ahmed Çelebi b. Abdullah, Mehmed Çavuş b. Osman el-Mübâşir, el-Hâc Selim b. Abdullah, Mustafa b. Âbidin.