Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 385 Hüküm no: 512 Orijinal metin no: [77a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostanti v. Papafil ve sairlerinin ortaklaşa inşa ettikleri binanın civarındaki binalardan yüksek olduğu iddiası üzerine keşfi Kâtib Mehmed Çelebi evkāfından olup mahrûsa-i Galata’da Sultan Bayezid mahallesinde vâki‘ bir tarafdan Nikola Morina ile ( ) nâm zimmîler tasarruflarında olan arsa ve bir tarafdan varilci Yakomi mülkü ve iki tarafdan tarîk-i âm ile mahdûd tûlen yirmi bir buçuk ve arzan dokuz buçuk bi hesâb-ı şatrancî iki yüz dört zirâ‘ arsanın icâre-i mu‘accele ve ayda elli beş akçe ücret-i müeccele ile mutasarrıfları olan ashâb-ı hâze’s-sifr Kostanti v. Papafil ve Yanaki v. Trandafilo ve Kiryako v. Panayot nâm zimmîler meclis-i şer‘-i şerîfe gelip her biri takrîr-i kelâm ve bast-ı merâm edip arsa-i mezkûre üzerine fevkānî ve tahtânî menzil binâ eylemek murâd eylediğimizde civârımızda sâkin olup işbu hâzır bi’l-meclis olan Demirci Yanaki ve varilci Yakomi nâm zimmîler bizim menzilimizden mürtefi‘ eylediniz, bize zararı vardır deyû mâni‘ olurlar hâlâ cânib-i şer‘den üzerine varılıp ba‘de’l-müşâhede mesâha olunup bizim için mertebe-i binâ ta‘yîn ve kıbel-i şer‘den dahi binâya izin verilmesi matlûbumdur dediklerinde savb-ı şer‘den mevlânâ Nasuh Efendi irsâl olunup ol dahi hâssa mi‘mârlarından üstâd Ali b. Abdullah ve zeyl-i kitâbda mastûrü’l-esâmî olan müslimîn ile arsa-i mezkûre üzerine varıp müşâhede eylediklerinde mi‘mâr-ı mezkûr dahi mesâha ve tahmîn edip arsa-i mahdûd-ı mezkûrenin tarîk-i kebîr tarafında tûlen on bir ve arzan dokuz buçuk bi hesâb-ı şatrancî yüz dört zirâ‘ arsası üzerinde tahtânî ve fevkānî yerden sakf kirişlerine varınca kadden on zirâ‘ ve yirmi dört parmak ve merkūm varilci Yakomi mülkü tarafında tûlen ve arzan bi hesâb-ı terbî‘î yüz zirâ‘ arsası üzerine kezâlik yerden sakfa varınca yirmi zirâ‘ binâ ihdâs olunsa civârında vâki‘ olan ebniyeden mürtefi‘ olmadığını ve zararı dahi yokdur deyû mi‘mâr-ı mezbûr haber verip ve sâir müslimûn-ı merkūmûn dahi icmâ‘ ve ittifâk eylediklerinde vâki‘ hâli mevlânâ-yı mezbûr mahallinde tahrîr, ba‘dehû ma‘an irsâl olunan Çukadâr Ebûbekir Beşe b. Şaban ile meclis-i şer‘a gelip alâ vukū‘ihî inhâ ve takrîr etmeğin mezkûrûna kıbel-i şer‘den binâya izin verilip mâ vaka‘a bi’t-taleb ketb olundu. Fi’l-yevmi’l-hâdî aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mehmed Beşe el-Hallâk b. Abdullah, Abdurrahman b. Yunus, Ahmed Çelebi b. Abdullah, Mehmed Çelebi b. Abdullah, Mehmed Çavuş b. Osman el-Mübâşir, el-Hâc Sâlim b. Abdullah, Hüseyin b. Mirza ve gayruhüm.