Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 386 Hüküm no: 513 Orijinal metin no: [77a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin esir olan Fâtıma Hâtun’un kurtulması işi için kefil olan Alihan Çelebi’yle olan davasında anlaşma sağlandığı Cezîre-i Paros sükkânından Yorgi v. Yani nâm zimmî mahfil-i kazâda işbu râfi‘ü’l-kitâb el-Hâc Alihan Çelebi b. Mustafa nâm kimesne mahzarında ikrâr ve takrîr-i kelâm edip bundan akdem dârü’l-harbde esîr olan Fâtıma bt. ( ) nâm hâtun kendi malından dört yüz esedî guruş verip beni tahlîs eyle, ben sana edâ edeyim deyû bana emr etmekle ben dahi emri ile malımdan dört yüz esedî guruş verip mezbûre Fâtıma’yı tahlîs edip mahrûsa-i Galata’ya dâhil olduğumuzda mezbûr Alihan Çelebi mezbûre Fâtıma’nın nefsine ve gaybet ederse meblağ-ı mezbûra kefîl olmuşidi ve mezbûre Fâtıma Hâtun dahi gaybet eylemişdir deyû meblağ-ı mezbûru mezbûr Alihan Çelebi’den mukaddemâ da‘vâ ve taleb eylediğimde ol dahi inkâr etmekle ben dahi ityân-ı beyyineden izhâr-ı acz etmeğin merkūm Alihan Çelebi ba‘de’l-istihlâf yemîn billâhi te‘âlâ etmişidi el-hâletü hâzihî merkūm Alihan Çelebi minvâl-i muharrer üzre kefâletini münkir iken yine mezbûre Fâtıma’yı meclis-i şer‘de bana teslîm etmeğin mezbûr Alihan Çelebi’nin zimmeti kefâlet-i mezbûreden berî olmuşdur min ba‘d husûs-ı mezbûre müte‘allika mezbûr Alihan Çelebi ile da‘vâ ve husûmetim yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: El-Hâc Kenan Bey b. Abdullah Kethüdâ, Abdülkerim Çelebi b. Mehmed, Mustafa Çelebi b. Receb, Hamza b. Abdülganî, Hüseyin b. Mirza ve gayruhüm