Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 387 Hüküm no: 515 Orijinal metin no: [77b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Todori’nin Yanaki Reis aleyhindeki alacak iddiasının reddedildiği Rüesâ tâifesinden Yorgi v. Todori nâm zimmî meclis-i şer‘-i hatîr-i lâzımü’t-tevkīrde işbu râfi‘ü’s-sifr Yanaki Reis v. Panayot nâm zimmî muvâcehesinde üzerine da‘vâ ve takrîr-i kelâm edip bundan akdem mezbûr Yanaki Reis yedine bi tarîki’l-mudârabe bin beş yüz akçe def‘ ve teslîm, ol dahi vech-i muharrer üzre yedimden ahz ü kabz etmeğin hâlâ meblağ-ı mezbûru merkūmdan taleb ederim, suâl olunsun dedikde gıbbe’s-suâl mezbûr Yanaki Reis cevâbında fi’l-hakīka vech-i muharrer üzre müdde‘î-i mezbûrdan bi tarîki’l-mudârebe bin beş yüz akçe ahz ü kabz ettiğimden sonra meblağ-ı mezbûr ile Kocamanlı nâm kasabadan tahta iştirâ ve sefîneme tahmîl edip mahmiye-i İstanbul’a gelirken bi emrillâhi te‘âlâ deryâda fırtına olmağla sefînem zikr olunan tahta bilâ-tü‘ad helâk olmuşdur deyicek mezbûr Yanaki Reis husûs-ı mezbûrda yemîn ile müsaddak olmağın fi’l-hakīka meblağ-ı mezbûr bin beş yüz akçe ile zikr olunan kasabadan iştirâ eylediği tahta sefînesiyle kendi yedinde vech-i muharrer üzre deryâda bilâ-tü‘ad helâk olduğuna mezbûr Yanaki Reis’e yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebiyle müdde‘î-i mezbûr bî-vech mu‘ârazadan men‘ birle mâ vaka‘a bi’t-taleb ketb olundu. Hurrire fi’l-yevmi’l-hâdî aşer mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Mustafa b. Receb, Ahmed Yazıcı b. Mehmed, Âbid b. Mustafa, Umran b. Mehmed, Siyavuş b. Abdullah.