Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 388 Hüküm no: 516 Orijinal metin no: [77b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Musa’ya olan borcunu ödemesi için boşandığı eşi Ali Beşe’ye tenbihte bulunulduğu Mahmiye-i Galata’da Şahkulu mahallesinde sâkine işbu râfi‘atü’l-kitâb Âişe bt. Musa nâm hâtun meclis-i şer‘-i şerîf-i lâzımü’t-teşrîfde zevc-i mutallıkı olan Ali Beşe b. Halil nâm kimesne muvâcehesinde üzerine da‘vâ ve takrîr-i kelâm edip târih-i kitâbdan üç sene mukaddem merkūm Ali Beşe zevcim olup beni talâk-ı selâse ile tatlîk etmeğin zimmetinde mütekarrir ve ma‘kūdun aleyh olan iki bin akçe mehr-i müeccelim ve cihet-i karz-ı şer‘îden beş yüz akçe ki cem‘an iki bin beş yüz akçemi mezbûrdan taleb ederim, suâl olunsun dedikde gıbbe’s-suâl mezbûr Ali Beşe cevâbında fi’l-vâki‘ mezbûre Âişe Hâtun’u talâk-ı selâse ile tatlîk edip zimmetinde iki bin akçe mehr-i müeccel ve cihet-i karz-ı şer‘îden beş yüz akçe ki cem‘an iki bin akçe deyni olduğunu ikrâr ve i‘tirâf etmeğin etmeğin alâ mûceb-i i‘tirâfihî meblağ-ı mezbûr iki bin beş yüz akçenin edâsına mezbûr Ali Beşe’ye tenbîh birle mâ vaka‘a bi’t-taleb ketb olundu. Hurrire fi’l-yevmi’l-âşir mine’l-Muharremi’l-harâm li sene erba‘a ve seb‘în ve elf. Şuhûdü’l-hâl: Receb b. Mustafa, Ahmed Yazıcı b. Mehmed, Hamza b. Abdülganî, Şaban Beşe Çukadâr.